Эгер са халкьдихъ чIал авачтIа, ватанни адахъ авач лагьайтIа жеда. Эхиримжи вахтара “Лезги газетдин” чинра чIалакай гзаф ихтилатар физва. ЧIалаз гьуьрметзавайбурун кьадар къвердавай тIимил жезвайди гьиссзава. Месела, РГВК-дай чи хайи лезги чIалал тухузвай “Вахтар ва инсанар” передачадин саки са пай урус чIалалди жезва. Вучиз чун и кIвалахдихъ галаз рази ятIа?
А передачайра кьве кас заз кьиляй-кьилиз чи дидед чIалал рахаз акуна. Абурни чи гьуьрметлу зарияр Къурбан Акимовни Арбен Къардаш я.
Къизляр районда авай Сарсаррин хуьруьн прунз цазвайбурукай передача кьиляй-кьилиз урус чIа-лалди хьана. Лезги чIал а хуьре амачни? И алай гьал акурла, лезги чIал хуьз кIанзавайбурун кефияр чIур жезва эхир.
Школайрани бегьем тарсар тухузмач. Чна кIелдай вахтунда, 4-класс куьтягьдалди, са тарс урус чIалалди тир, муькуь тарсар — лезгидалди.
Бес а вахтара кIелай ксарикай тIвар-ван авай алимар, еке къуллугърин иесияр хьанвачни? Чи республикадин депутатривай и кIвалах-диз фикир гуз жезвачни? Чи чIалар квахь тавун паталди, вирида сад хьана, женг чIугун лазим тушни?
ЦIинин газетдин пуд лагьай нумрадай кьилин редактордин заместитель Куругъли Ферзалиева шаир Фейзудин Нагъиевахъ галаз авунвай суьгьбет кIелайла, лезги чIалан къадир авай гьар са касдин кефи чIур жеда. Ана гъанвай делилар къурху кутадайбур я. Ша чун шко-лайра, колледжра, университетра хайи чIалал кIелдайбурун кьадар артухариз алахъин.
ЧIал халкьдин хазина я. Чун сад тахьайтIа, а хазина квахьда.
Шихали Багъиров
