Карчи инсанрикай
КцIар райондин тIебиатдин гуьрчегвили инсанар акI вичел чIугвада хьи, адан гьейранвилин къужахда гьатай гьар са кас геждалди есирда амукьда. Ашукь хьанай и ерийрал Лермонтовни. Ина адан къелемдикай илгьамдин зурба шейэр хкатнай. Туристри Шагь дагъдин живеди кьунвай кукIушриз иллаки еке итиж ийида. Суьгьуьрдин хьтин тамарикай мад рахамир.
И гуьрчег ерийра яшамиш жезвай инсанарни ихьтин гуьзел тIебиатдихъ галаз сих алакъада ава, санал ала. Зун гьамиша гьейран я абурун гуьрчегвилелни мерд, чIехи рикIерал, лезги намусдал, руьгьдин такабурлувилел, милайим хесетрал, гьакIни камаллу суьгьбетрал. И райондай тIвар-ван авай машгьур алимар, муаллимар, духтурар ва маса кеспийрин иесияр гзаф акъатна. Къенин зи ихтилат лагьайтIа, зегьметчи инсандикай я.
Заур Бедалов. Ам 1981-йисан 7-декабрдиз дустагьирви Зенмфиран хизанда КцIара дидедиз хьана. Хизанда адалай гъейри мад са гадани руш авай. Заура 5-классда кIелдайла, адан диде жегьилзамаз кечмиш хьана. Аялриз тахай дидедин чин къалур тавун патал буба мад эвленмиш хъхьаначир. КIвале аялриз килигзавайбур чIехи бадени буба тир. Гатун вахтара Заурни, маса аялар хьиз, чпелай алакьдай кIвалахар ийиз фидай. Ада сифте зегьмет чIугур чка ресторан я. Ана ада официантвилелай башламишнай.
Вахтар къвез алатна. Мектебни акьалтIарна. Заур вичин гележегдин пешедиз — ресторандин бизнесдиз, са кьадар тежриба аваз, уьтквемдаказ гьахьна. Ингье саки 30 йис я Бедалова и рекьяй зегьмет чIугваз. Шумудни са йисуз ада гзаф ресторанра кIва-лахна. Эхиримжи 8 йисуз Бедалов райондин гуьрчегди тир “Эдельвейс” тIвар алай мехъе-рардай кIвалин администратор я. Адан гъилик 45 кас ква. Зауран намуслу, тешкиллу зегьметдилай мехъерар авур вирибур гзаф рази я. З.Бедалова коллективдивай кIвалах хъсандаказ кьилиз акъудун истемишзава. Ме-ню иллаки важиблу я. И барадайни мехъеррин мугьманри гьамиша разивалзава.
Мехъерар алахьайла, ахпа Заур ял ягъиз кIвализ геж хьиз хквезва. КIвале ам хизанри гуьзетзава. Адан рушани гадади мектебда кIелзава. Кайваниди кIвал-хизан кьиле тухузва. Заур бубади фад эвленмишна. Свас гъидалди Заура чIехи бадедиз вири патарихъай — гьам хуьрек гьазуриз, гьам пек-партал чуьхуьз куьмекардай. Баде кечмиш хьайила, ада вичин кьисмет яз гьиливидин руш Айнура хкяна, кIвал-юкъ кутуна. Айнура Зауран бубадихъ хъсандиз гелкъвей свас я. ГьикI лагьайтIа, Заур датIана кIвалахал алай, кIвалин вири дердияр Айнурадин хиве гьатнавай. Апай адалай гзаф рази тир. Заурани бубадилай гзаф разивалдай, гьикI хьи, адаз тахай дидедин чин къалурнач.
Бубадин тарсар Заураз гьамиша вине я. Вине кьазва ада гьакIни чи къадим адетар, бубайрин камаллу весияр, халкьдин тарих. Ам кьисметдал рази, рикI ачух, руьгь михьи инсан я. Зауран вилерай за кьатIайвал, ам инсанриз шадвал, экв багъишиз алахъзава. Ада инсандиз чандал чка ийида.
Азад вахт Заура хизанда вичин аялрихъ галаз акъудзава. Хва Амира тхэквондодай акъажунра хъсан чкаяр кьуна, гьакI районда кьиле фейи маса мярекатрани. Адахъ дзюдодайни гьунарар ава. Руш Минаради 9-классда кIелзава. Диде-бубадин мурад вирибурун веледар бахтлу хьун я.
2015-йисуз Азербайжанда кьиле фейи олимпиададин цIай КцIара Заура тухванай. Гьелбетда, им еке ихтибар я. Ада республикада ва районра кьиле физвай бязи мярекатрани активвилелди иштиракзава. Адахъ ресторандин бизнесдин рекьяй вичин хсуси фикирар ава, карда гьамиша цIийивилер тваз чалишмишвалзава. Заур Бедаловаз маса уьлквейрай ярар-дустари кIвалах ийиз анриз ша лугьуз хьанай. Амма адаз гъурбатрин еке пулар, мажибар кIан хьанач, багъри ватанда жуванбурун арада хьун ада еке бахт яз гьисабзава. Зауран рикI музыкадал алаз акурла, композитор Фаиг Къардашова адаз ва адан коллективдиз вичин патай мани теснифна, багъишна. Межлисра ягъун патал. Герек хьайи береда Зауран патав лазим чкадал къуьн кутадай жумарт стхаяр хьтин Эмин Исаев ва Жомшуд Башаратовни гва.
Мехъеррин гьар са иесидиз “Куь балаяр бахтлу хьурай!” лугьуз, шад межлисар башламишзавай Зауран, гьакI вири кцIарвийрин балайризни къуй хушбахт уьмуьр хьурай!
Бикеханум Алибегова
