И фу, адет яз, дагъдин хуьрера руш тухудайла, сусан патай чамраз савкьат яз чрада. Руш рекье твадайла чрадай фаз “рекьин фу” лугьуда.

Са кунз чурун патал кьурай як, хипен нисидин кьил, 2 кака, 4-5 тIур чIем, са сукI­ра иситIа герек къведа. Тини гъвар (хемир) кваз ишинда. Кьурай як чими цик чуьхвена, жезмай кьван куьлуь ийида. Хипен нисидилай яд илична, са къайдада шуькIуь кIусар атIуда. Якни ниси какадарна, кьел шит яни, тушни килигда, лазим хьайитIа, са тупIари кьур кьел, кьвед — пуд тIур чIем­ни какаяр хъивегьна хуькуьрда. Тинидикай кIвала­кIар кьуна, элкъвей са къайдадин чкалар кутада. Гьазурнавай якни ниси къене туна, къерехар кьуна, винелай къатух квай са кап яд элкъуьрна, цIакулар яда.

Хьраз вегьена, цIай са кьадар секинарна, вахт-вахтунилай вил ягъиз, чрада. Кунз чрайла,  кьурай якIун ни гьатда, нисиди кьеж гуда. Гила ам кьулунал акъудна, са тIимил кьван рекъидалди тада. Ахпа винелай чими авунвай иситIа элкъуьрда. ИситIа са кьве тIуб кьван яцIувал аваз, гьайиф татана эл­къуьрна, винел пад цIалцIа­марда. Кунзар, иер синийра эцигна, сусан сандухрин винеллаз цIийи хизандиз рекье твада­.

Нарима  Агьмедова