Малум тирвал, алай йисан 13-сентябрь сечкийрин сад тир югъ я. Дагъус­танда и юкъуз сечкийрин участокрин 1557 комиссия кардик жеда. 599 округдай 6061 депутат ва кьве хуьруьн адми­нистрациядин кьилерни хкягъун лазим я. РД-дин сечкидин комиссияди ма­лумарайвал, сечкийрин сад тир юкъуз­ 1 миллионни 300 агъзур кас учас­токриз къведа. Ида республикада авай вири сечкичийрин 80 процент тешкилзава.

Сечкийриз “Сад тир Россия” пар­тиядин Дагъустандин региональный отделенини гьазур жезва. И йикъара партиядин региональный политсоветдин президиумдин заседание кьиле фена. Анал партиядин ДРО-дин секре­тардин 1-заместитель, РД-дин Халкьдин Собранида “Сад тир Россия” фракциядин регьбер Сайгидагьмед Агьмедова отделенидин вилик акъвазнавай месэлайрикай лагьана.

Кьилин везифайрикай сад “Сад тир Россия” партиядин патай гележегда хкядай депутатрин кандидатураяр тайинарун патал виликамаз тухудай сечкияр тешкиллувилелди гьазурун ва кьиле ту­хун я. И жуьреда кан­дидатар тайинарун цIийивал туш, гьеле 2015-йисуз РД-дин Халкьдин Соб­ранидиз ва Госдумадиз де­путатар хкядайла, адакай менфят къа­чунай.

ДРО-дин исполнительный комитетдин руководитель Мегьамед Мегьа­медова къейд авурвал, виликамаз тухузвай сечкийрин кьетIенвал ам я хьи, 10 агъзурдалай гзаф сечкичияр авай муниципалитетрин сечкичийривай, са манийвални авачиз, талукь участокдиз атана, чпиз хуш кандидатдиз сес гуз жеда.

— Малумариз кIанзава,- давамарна М.Мегьамедова,- алай йисан 20-февралдилай 1-мартдалди “Сад тир Россия” партиядин чкадин отделенийра чна тешкиллувилин комитетар арадал гъанва. Абуру виликамаз тухуз­вай­ сечкийрин иштиракчияр-кандидатар регистрация ийида. Кандидатрин кьадарни тIи­милди туш — 6 агъзурдалай гзаф жеда.

Тешкиллувилин комитетри 10-майдалди виликамаз тухузвай сечкийра иштиракдай вири ксарин сиягьар туь­кIуьрна ва тестикьарна кIанда. Виликамаз тухвай сечкийрин нетижаяр 2-июндалди кьада, ахпа партияди депутатвиле кандидатар къалурда.

 

Халкьдиз — секин уьмуьр

Алатай гьафтеда “Дагъустан” РИА-да РД-дин Халкьдин Собранидин депутатар, “Гьахълу Россия” сиясатдин  пар­тиядин региондин отделенидин векилар (Камил Давдиев, Мурат Пайзулаев ва Марат Ярметов) республикадин массовый информациядин такьатрин журналистрихъ галаз гуьруьшмиш хьана. Месэ­ла сад тир — уьлкведа кьиле физвай дегишвилерикай ва “Гьахълу Рос­сия­ди” уьлкведин Конституциядик кухтазвай алавайриз талукь яз гузвай теклифрикай агьалияр хабардар авун.

— Президент Владимир Путина Фе­деральный Собранидиз кIелай Чарче РФ-дин Конституциядик чарасуз са бязи дегишвилер кухтуна кIан­завай­дакай авур теклифдикай къе Россиядин Федерациядин вири халкьариз хабар ава, — лагьана региондин отделенидин председатель, РД-дин Халкьдин Собранидин Председателдин заместитель К.Давдиева. — Политический партийри, политологри, юристри, зегьметчи коллективри, кьилдин агьалийрини гузвай теклифар кьабулдай, веревирд ийидай, герекбур хкядай махсус комиссиядини кIвалах­зава. Уьлкведин халкьар па­тал важиблу месэла гьялзавай и ма­къамда “Гьахълу Россия” партияни кьулухъ акъвазнавач. Лап кар алай ва кьилин месэлайрин гьакъиндай Конституциядик алаваяр кухтун патал чна дуьзгуьн ва гьар са агьалиди хъсанбур яз гьисабзавай теклифар ганва.

Депутатди лагьайвал, абурук акатзава: агьалияр пенсиядиз фидай вахтар виликан рекъемрал — дишегьлияр — 55, итимар 60 йис хьайила — хкун, эвездин пулар хгун тавунмаз, агьалийриз государстводин патай авай яшайишдин кьезилвилер  квадардай федеральный законар кьабулунал къадагъа эцигун; виликамаз тайинарзавай инфляциядин дережадин кьадарда аваз пенсияр кIва­лахдик квачирбурузни, квайбурузни гьар йисуз индексация ийидай положение мягькемарун. Конституциядай Россиядин Банк садалайни аслу жедач лу­гьу­дай ихтилат акъу­дин, банкдин кIва­лах гьукумдин госорганриз муьтIуь­гъа­рун ва адан хиве мадни везифаяр хтун: Центробанкди неинки манат дурумлу, мягькем авунай жаваб гун лазим я, ада гьакI эко­номи­кадин дережа хкажунай, агьа­лияр кIва­лахдалди таъ­минардай шар­тIар арадал гъунайни жаваб гун лазим я; мажибдин агъа кIанин кьадар инсан яшамиш хьун патал тайинарнавай пулунин кьадардилай тIимил хьун ла­зим­ туш; государстводин къуллугърал алайбуруз кьве “гражданство” та­хьун Конституцияда къейд авун лазим я.

— Госдумада “Гьахълу Россиядин” фракциядин руководитель Сергей Миронова “Сад тир Россия”, КПРФ, ЛДПР партийрин фракцийрин депутатризни чпин теклифрин, алавайрин тереф хуьниз эвер ганва, лагьана М.Ярметова. — Чи теклифар халкьдиз асайиш уьмуьр тешкилунихъ элкъуьрнавайбур я. Уьлкведин Президентди и сеферда РФ-дин Гьукуматдивай агьалийрин патай разивал ийиз жедай бязи къарарар кьабулун исте­миш­навайтIани, чи пар­тия эсиллагь ра­зи тушир крар тIимил авач. Чна Пре­зидентдизни, Госдумадизни, Гьукуматдизни са шумудра кхьена, теклифар гана: мажибрин агъа кIанин кьадар 22-25 агъзур манат жен, гос­ор­ганра, идарайра кIвалахзавай чиновникрин, энергоресурсар, банкар, госкорпорацияр гъилера авайбурун вацран са шумуд миллиондин мажибар уьлкведа юкьван мажибдин кьадардал хкун, “потребительский корзинадин” пулдин кьадар 30-31 агъзур яз тайинарин, дуьньядин гзаф уьлквейра хьиз, пенсионер рагьметдиз фейила, адан пенсия, ирс яз, эвледриз гун, “дидевилин  капитал” гьа сифте йисуз (пуд йисалай ваъ) ишлемишдай ихтияр гун, Ватандин ЧIехи дя­ведин йисарин аялриз кьезилвилер гун, губернаторар, мэрар, сечкичийри сесер гуналди хкягъун, бензиндин къиметрал государстводи гуьзчивал авун, школьникриз чими хуьрекар гьазурун патал тайинарнавай 15 манат лап тIи­милди яз гьисабун… Гьайиф хьи, я Гьу­куматди, я Госдумади и теклифар гьелелиг кьабулнавач. “Гьахълу Россия” чи агьалийрин яшайиш хъсанардай, агьваллувал хкаждай, абурун ити­жар хуьдай законрин проектар, теклифар гваз гьамиша майдандиз экъечI­да ва талукь органривай кIеви истемишунарни ийида, — алава хъувуна М.Ярметова

“Гьахълу Россиядин” векилри журналистрин суалризни жавабар гана.

Хийир  Эмиров