“Лезги газетдиз”

Дестек я чи, къуллугъзавай даима,

Женгинавай хва хьиз я ам къагьриман,

Кхьихь газет, жедач садни куьн пашман,

Лезги кIвалин абур я “Лезги газет”.

 

Асирдин рехъ атIанава уьтквемдиз,

Къилав гана шумудни са къелемдиз,

Ви тIвар, газет, машгьур я къе алемдиз,

Лезги кIвалин абур я “Лезги газет”.

 

Уьмуьр физва, ийиз хемис югъ гуьзет,

Къачур бере багьа мугьман — чи газет,

Ажеб гузва ада чандиз зи лезет!

Лезги кIвалин абур я “Лезги газет”.

 

Вун авачиз къведач зи рикIиз кьарай,

Вил гала зи шаиррин чIаларихъ чрай,

Асирра вун нурлу рекьеваз фирай,

Лезги кIвалин абур я “Лезги газет”…

Эйзудин  Сайдумов,

ДаркIуш-Къазмаяр.

 

Вири девлет…

“Заз гьинал кьван герек я ви лезги чIал?

Агакьдалди и патав гвай Дербентдиз?”

Лагьаналда са алчахди, кьам гачал,

Мез шанкIална, шутI ягъайда бедендиз!

 

Вун ни хана? Вун ни хвена,  эй ягьсуз?

Нин зегьмет я ракъурайди на бада?

Дидедин чIал квадарзавай  вафасуз!

Къакъуда ам чи халкьдивай, я Худа!

 

Гьуьрмет тийиз жуван хайи  дидедиз,

Жув алай хел атIузвани мишердив?

Вучиз чизвач ви акьулсуз келледиз,

ЧIал авачтIа, халкьни ахьтин тежерди?

 

ЧIал амай кьван миллетдин яш яргъи я,

ЧIал гьар халкьдин руьгь къалурдай гуьзгуь я!

Зи чIал кIанид ватанперес эгьли я,

Къавкъаздин лекь — лап халисан лезги я!

 

Зи хайи чIал, ибери чIал, лезги чIал,

Заз дидеди некIедик кваз гайи чIал,

Жедай туш вун зи мецелай алудиз,

ГьикI жедачтIа як кикевай къакъудиз.

 

Шалбуз дагъдин лекьеривай жагъай чIал,

Зи кьепIинихъ дидед лайлай лагьай чIал,

Камаллу тир гафаривди чIагай чIал,

Гьажи Давуд, Етим Эмин рахай чIал!..

 

Дидед чIалал рахада зун шириндиз,

КIвале, къеце, лап гьа Марсдал фейитIан.

Кьадай туш за маса чIал ви ериндиз,

Вири девлет и чилин заз гайитIан!..

Саид Ибрагьимов,

Моллакент