1989- йисан 15-февраль Афгъанистандай чи аскерар ахкъудай югъ я. А дяведи гзафбурун рикIериз тIарвилер гана.
Мегьарамдхуьруьн райондин Бут-Къазмайрин хуьруьн мектебда и вакъиадиз талукь мярекат кьиле фена. Ам школадин директор Абдуллаев Гуьлмета ачухна, ада школадин коллективдиз, атанвай мугьманриз сагъвал, шадвал ва кьилел михьи цав хьун алхишна.
Бут- Къазмайрин хуьряй Афгъанистандин дяведа Къадашев Шимшибала Селягьовича, Саидов Алик Абдулмеликовича, Мегьамедов Халикь Абдурагьимовича ва Алиметов Софьян Саламовича иштиракна.
Армиядиз фейи гьар са аскер дидейри саламатдиз хтун гуьзлемишзавай.Гьайиф хьи, гьамиша икI жезвач. Афгъанистанда телефвилерни хьана. Абурукай сад, чи школа куьтягьай Алиметов Софьян, стрелок-гранатометчик тир. Ам Ахцегь райондин Мацарин хуьре дидедиз хьана. 1980-йисан 9-октябрдиз Мегьарамдхуьруьн райвоенкоматди адаз яракьлу къуватрин жергейриз эвер гана. 1981-йисан январдилай Афгъанистандиз акъатна. Ада са шумуд сеферда къати женгера иштиракна. 1982-йисан 26- июндиз адан взводди душмандихъ галаз къати женг туъхвана, гзафбур телеф хьана, гьа жергедай яз — Алиметовни.
Ам Бут-Къазмайрин хуьре кучукнава. Игитдиз хуьре 1999-йисуз гуьмбет эцигна. Гьар йисуз мектебдин аялри, муаллимри а гуьмбетдал цуьквер эцигзава.
Мярекатда иштиракиз, ветеранрин советдин председатель Алиев Абидин, Советский хуьруьн кьил Асваров Эмирагъа, Афгъанистандин дяведин иштиракчи Алимирзоев Эдуард, Бут-Къазмайрин хуьруьн кьил Урдуханов Рафик ва Алиметован вах Рамазанова Редифа атанвай. Стха рикIел хкунай ва мярекат тешкилай вирибуруз ада сагърай лагьана.
Софьянан классдин руководитель Агьмедов Явер муаллимди адакай гегьенш суьгьбет авуна.
Мярекатдал Афгъанистандин дяведин иштиракчийриз талукьарнавай шиирар кIелна ва манияр лагьана.
Заира Мухтарова,
дидед чIалан муаллим
