Алагьвердиев Шагьламаз Шагьламазович 1921-йисуз Вини АрхитIрин хуьре кесиб лежбердин хизанда дидедиз хьана. 1942-йисуз ам Хив райондин РВК-дай гуьгьуьллудаказ фронтдиз фена.
Ана архитIви артиллериядин училищедиз ракъурна. Училище куьтягьай жегьил лейтенант Кефер патан Кавказдин фронтдин 9-армиядиз рекье туна. Алагьвердиева офицер-командир яз викIегьдаказ Керчда, Севастополда, Крымда, Одессада, Харьковда хьайи къати женгера иштиракна ва маса шегьерар чапхунчийрикай азадна.
1943-1944-йисара ам взводдин командир ва батальондин комсомол организациядин секретарь яз хьана.
Ватан ва Европадин уьлквеяр пехъи душмандикай азадай гьунарлу офицердиз капитандин чин гана. Гъалибвилин югъ ада Гамбургда къейднай.
Ватан хуьнин ва ам душмандикай азад авунин къати женгера къалурай гьунаррай Алагьвердиев Шагьламаз гьукуматдин гзаф наградайриз лайихлу хьана. Адаз Ватандин дяведин 2 лагьай дережадин, Яру Гъетрен, Яру Пайдахдин орденар ва цIудав агакьна медалар гана. 1946-йисуз ам хайи хуьруьз хтана.
Дяведилай гуьгъуьниз ада Хив, Мегьарамдхуьруьн районрин прокуратурайра кIвалахна. ВПШ куьтягьайла, партиядин Хив райкомдин отделдин заведующий яз ва пенсиядиз фейидалай гуьгъуьниз райондин «Сафаралиевский» совхоздин профкомдин председатель яз кIвалахна. 1995-йисуз фронтовик рагьметдиз фена. Кьегьал рухвайрин тIварар, гьунарлу крар чи рикIера эбеди яз амукьда.
Рамазан Велибегов
