Дербент райондин администрациядин залда Дагъустандин дишегьлийрин Союзди РД-дин кьиблепатан территориальный округдик акатзавай районрин дишегьлийрин советрин конференция кьиле тухвана.
“Жавабдар диде-бубаяр. Халкьарин адетар, зегьметдинни ватанпересвилин тербия гунин рекье дишегьлийрин общественный тешкилатрин мумкинвилерин тежриба” темадиз талукьарнавай.
И мярекатда Кьиблепатан территориальный округда РД-дин Кьилин патай тамам ихтиярар ганвай векил Энрик Муслимова, Дагъустандин дишегьлийрин Союздин председатель Интизар Мамутаевади, аялрин ихтиярар, хизан ва дидевал хуьнин рекьяй РД-дин Кьилин патай тамам ихтиярар ганвай векил Марина Ежовади, Дербент шегьердин ва райондин муниципалитетрин кьилер Малик Баглиева ва Мегьамед Желилова, Мегьарамдхуьруьн райондин дишегьлийрин Советдин секретарь Гуьлмира Закуевади, Дербент шегьердин 17-нумрадин школадин директор Аминат Шихмегьамедовади, Докъузпара райондин Авадан хуьруьн дишегьлийрин советдин председатель Раиса Къиличхановади, Сулейман-Стальский райондин дишегьлийрин общественный тешкилатрин патай Эльза Рустамовади, Дербент шегьердин дишегьлийрин советдин председатель Валерия Хасановади, Рутул райондин дишегьлийрин советдин председатель Гуьлжан Рамазановади, общественный тешкилатрин векилри ва масабуру иштиракна.
Конференция ачухай Мегьамед Желилова асирралди авай адетар хуьнин, акьалтзавай несилдиз хайи чил, чIал кlанарунин ва гражданар обществодиз хийирлу хьунин карда дишегьлийрин общественный тешкилатри къугъвазвай роль екеди тирди къейдна. Ада гьакlни райондин администрацияди акьалтзавай несилдиз ватанпересвилин тербия гунин рекье тухузвай кlвалахдикайни лагьана.
— Аялриз дуьзгуьн тербия гун -им диде-бубайрин кьилин къайгъу я, — давамарна ада. — Диде дишегьлидин хиве вичин веледдиз тербия гунин жигьетдай чlехи жавабдарвал ава. Иллаки дидедин гафуна аялдин руьгьда уьмуьрдин гьахълувилин хазина тун, зегьмет чlугваз чирун, жуван Ватан кlанарун ва руьгьдинни эдебдин ерияр вине кьун ава.
Энрик Муслимова РД-дин Кьилин везифаяр вахтуналди тамамарзавай Владимир Васильеван тlварунихъай конферециядин иштиракчияр тебрикна.
— Чи гьар садан уьмуьрда, чна кьадар авачир кьван сагърай лугьузвай са кас ава — ам чи диде я, — лагьана Э.Муслимова. — Ада чи кьепlинин кьилихъ лагьай лай-лай чи уьмуьрдин эхиримжи декьикьайралди чахъ гала. Чаз четин хьана, чна чи дердериз, месэлайриз дарманар жагъурдайла, а дарман чаз чи диде жезва, адан сидкьидин ва камаллу меслятар. Чун гьина аваз хьайитlани, дидедин гуьрчег ва хъуьтуьл хъверди чав чимивал агудзава.
Дидейрин югъ мубарак уналди, абуруз сагъвал, ислягьвал, хъсанвал алхишуналди, Э.Муслимова Дагъустандин дишегьлийрин Союзди тухузвай зурба кlвалах къейдна.
Трибунадихъ экъечlай Малик Баглиева шегьерда 65 агъзурдав агакьна дишегьлияр яшамиш жезвайди ва вич шегьердин дишегьлийрин советди тухузвай кlвалахдилай рази тирди лагьана.
— Къуръанда кхьенва: “Женнет дидейрин кlвачерик ква”, — ибур, дугъриданни, гьахълу гафар я — давамарна ада. — Гьайиф хьи, чна абуруз гьамиша бес кьадар дикъет гузвач, гьикьван кlан хьайитlани, чна абур патал чалай алакьдай вири крар ийизвач. Гьуьрметлу, чи багьа дишегьлияр, чна куь гьар садан далудихъ гьамиша квез даях жедай, гьар са карда куьмек гудай халисан эркек кьегьалар хьун алхишзава. Квез сагъвал, бахт, агалкьунар хьурай.
Интизар Мамутаевадин рахунрай малум хьайивал, алай йисуз Дагъустандин дишегьлийрин Союздин 25 йис тамам жезва ва и юбилей тухудай зурба программа гьазурнава.
— За умадзава хьи, куьн вири и кlвалахдив жавабдарвилелди эгечlда ва юбилейдин йис лайихлудаказ кьиле тухуда, — къейдна ада.
— Дишегьлийрин Советдиз 23 йисуз машгьур дишегьлиди, бажарагълу инсанди регьбервал ганай. Адахъ эркекдин кьегьалвал, дишегьлидиз хас зерифвал, акьулдин камаллувал авай. Ам, чи зурба шаир Фазу Алиева тир. Заз ада башламишай зурба кlвалах чна лайихлувилелди давамарна кlанзава.
Докладар гваз конференциядал рахай Гуьлмира Закуевади, Аминат Шихмегьамедовади, Раиса Къиличхановади, Эльза Рустамовади, Гуьлжан Рамазановади, Кьурагь райондин Арабляр хуьруьн школадин директор Саят Юсуповади ва масабуру дидевилинни бубавилин, акьалтзавай несилдиз дуьз тербия гунин, халкьдин адетар арадал хкунин ва абур хуьнин, зегьметдинни ватанпересвилин тербия гунин месэлаяр веревирдна.
Дербент шегьердин дишегьлийрин советдин председатель Валерия Хасановади конференциядин иштиракчийрин эвер гун раижна.
Къагьриман Ибрагьимов
