РикIин гаф
Яшар жезва ви дуьм-дуьз виш,
Тушни им бес зурба дуьшуьш!
Хъсанвилихъ хьухь мад дегиш,
Гьакъисагъдиз чIугваз зегьмет,
Ай лезет, “Лезги газет”!
Машгьурзавай Лезги ватан,
Йикъалай-къуз тир авадан,
Пакдиз хуьзвай даим адан
Хайи чIални — элдин девлет,
Ай лезет, “Лезги газет”!
Уьмуьрлух яз ви терефдар,
Жагъур ийиз жуванни тIвар,
КIелзава за вун цIарба-цIар,
Зи патай бул аваз гьуьрмет,
Ай лезет, “Лезги газет”!
ЛагьанватIан рикIин гаф ваз,
Тикрарда за, лайих акваз,
Шииррани вавди рахаз,
Нариманаз хьанва хесет,
Ай лезет, “Лезги газет!”
Жезва пудкъад йис къе-пака,
Вахъ галаз за хуьз алакъа.
Мадни и рехъ кьаз алахъда,
Кьуьзуьвилиз тагуз муьгьлет,
Ай лезет, “Лезги газет”!..
Нариман Къарибов
Мубарак!
Дагъларилай къарагъай хьиз нефесар,
Михьи жезва къе чи хурун кьефесар.
Хайи халкьдин хкажзавай гьевесар,
Квез виш йисар мубаракрай, лезгияр!
Лезги чIалан “Лезги газет” — хабардар,
Ви гьунарри чка кьазва са кьадар.
Чи Ватандин рухваяр тир арифдар,
Квез виш йисар мубаракрай, лезгияр!
Гафарганрин кIватIалар гвай устадар,
Дуьньядин гьал элдиз ийиз успатар.
Йигин вацI хьиз, гаф илигдай устIарар,
Квез виш йисар мубаракрай, лезгияр!
“Лезги газет” лезги чилин я дамах.
Куьн — чубанар, чун гъилевай я чумахъ.
Герек хьайтIа, экв куькIуьрдай я чахмах,
Квез виш йисар мубаракрай, лезгияр!
Юбилей я лугьуз, хабар чаз атай,
Хийир-дуьа хьурай гъуцарин патай.
Шад тебрикар кьабул ая зи патай,
Квез виш йисар мубаракрай, лезгияр!
Соня Ибрамхалилова
Зи дамах
КIанда гьамиша рикIиз
Лезги газет фад кхьиз,
Шад хабарар гьар кIвализ
Алакьзавай хушдиз гъиз.
Лезги газет я, гьелбет,
Зи хайи чилин девлет.
Эцигиз жедач къимет,
Чандин, руьгьдин я лезет.
Рахадай на чирда чIал,
КIелда чна, къвез санал,
Дамахда гьар гафунал,
Виш йисан ви уьмуьрдал.
Шекердилай мез ширин,
Макъалаяр лап дерин,
КIел авурла гьар са чин,
Регьят жеда тIал рикIин.
Тарихдин вун я хьи багъ,
Дидед чIалан мерд утагъ,
Зи гьар йикъан хуш уртах,
“Лезги газет” — зи дамах…
Къазалийрин Гьасан
