РД-дин физический культурадин ва спортдин министерстводин пресс-къуллугъди хабар гузвайвал, Дагъустанда (гьакI санлай вири Кавказда) алай вахтунда Америкадин машгьур Showtime (пулдихъ къалурзавай ва спутникдин) телеканал патал съёмкайрин VICE (вебсайт, интернет-канал, пулсуз журнал, фильмаяр туькIуьрдай) компаниядин дестеди единоборствойрикай, кьилди къачуртIа, азаддаказ кьуршахар кьуникай документальный фильм гьазурзава.
— Чи кьилин везифайрикай сад Кавказда, гьа гьисабдай яз Дагъустандани единоборствойрин, кьилди къачуртIа, кьуршахар кьунин искусство ачухарун — спортдин и жуьредай дуьньяда виридалайни машгьур ксар Кавказдай акъатунин сирерай кьил акъудун я. VICE компанияди адетдинбур тушир единоборствойрикай са шумуд программа гьазурнава, абур хсуси чи каналда эфирдиз акъатна. Чи компаниядихъ спортдин кьилди са и жуьредал машгъул ксарикай фильмаяр туькIуьрдай тамам са подразделение ава, — суьгьбетна съёмкайрин дестедин векил Сергей Бровкина.
Адан гафаралди, съёмкаяр патал Махачкъалада азаддаказ кьуршахар кьунай Олимпиададин къугъунрин чемпионар ва призёрар гьазурнавай Гьамид Гьамидован тIварунихъ галай спортшкола хкянава.
— Дагъустанда азаддаказ кьуршахар кьунал гзаф аялар ва жегьилар, яни гьар кьвед лагьай гада машгъул жезвайди къалурун патал чна ина — дуьньяда виридалайни хъсанбурукай сад тир и школада — тренировкаяр кьиле физвай вахт лентиниз къачунва, — лагьана ада.
Гуьгъуьнлай съёмкайрин дестедин векилар Дагъустандин физический культурадин ва спортдин министр М.Мегьамедовахъ галаз гуьруьшмиш хьана. Мегьамед Юсуповича абуруз Махачкъаладин спортдин объектар, гьа гьисабдай яз спортдин цин жуьреяр патал эцигна акьалтIарзавай чIехи зални къалурна.
Къецепатан мугьманар Али Алиеван тIварунихъ галай ШВСМ-дизни фена, Дагъустандин “азадбур” ва спортдин маса жуьрейрал машгъул ксар патал ана гьихьтин шартIар яратмишнаватIа таниш хьана.
Регина Семедова