Ражабов Дадаш 1900-йисуз Куьре округдин Лака хуьре кесиб лежбердин хизанда дидедиз хьана. Вичин цIувад йис жедалди ада хуьре медресада кIелна, диде-бубадиз вичелай алакьдай куьмекар гуз хьана. 1915-йисуз ам Баку шегьердиз фена. Ана ам стхаяр тир Нобелрин нафтIадин буругъра фялевиле кIвалахал акъвазна.
Бакуда Д.Ражабов кIвенкIвечи рабочияр — революционерар тир Тарикъули Юзбеговахъ, Къазибег Акимовахъ ва масабурухъ галаз таниш хьана. Инкъилабдилай гуьгъуьниз Дадаш вичин юлдашрихъ галаз Дагъустандиз хтана.
Советрин гьукуматдин сифте йисара Д.Ражабов “Дагчекдин” органра къуллугъдал акъвазна. Ада Хасавюртдин округда цIийи гьукумдиз акси бандитрихъ галаз женг чIугуна. Гьа са вахтунда ада вичин чирвилерин дережани хкажна: Дагпартшколада, Москвадин Дзержинскийдин тIварунихъ галай сад лагьай школада, РагъэкъечIдай патан зегьметчийрин коммунистический университетда кIелна.
Хуьруьн майишат коллективизация ва уьлкве индустриализация ийизвайла, Ражабов республикадин, округдин ва райондин жавабдар къуллугърал хьана. Ада Куьре округдин исполкомдин председателвал авуна. Округ экономикадин, культурадин жигьетдай вилик тухунин месэлайриз еке фикир гана.
Гуьгъуьнлай ада ВКП(б)-дин Табасаран райкомдин секретарвиле, Хасавюрт райондин Роза Люксембурган тIварунихъ галай совхоздин директорвиле, Дагъустандин “Заготзерно” карханадин крар идара авунин къуллугъдал кIвалахна.
Ватандин ЧIехи дяведин йисара Д.Ражабова Яру Армиядин кьушунрик кваз Украина, Польша, Чехословакия ва маса уьлквеяр фашистрикай азад авунин женгера иштиракна. Немсерин фашистрихъ галаз кьиле фейи женгера къалурай гьунаррай Д.Ражабоваз гьукуматдин виниз тир наградаяр гана. Дяведилай гуьгъуьнин йисара Д.Ражабов жуьреба-жуьре кIвалахрал хьана. Ада Хуьрегрин хуьруьн 7 йисан школадин директорвал, ахпа Хив райондин “Хиврин колхозник” газетдин редакторвал, райсобесдин заведующийвал ва маса кIвалахар авуна.
Рамазан Велибегов
