Коронавирус агакьна
Роспотребнадзордин кьил А. Поповади “Новости” РИА-диз хабар гайивал, коронавирусдикди начагъ хьайи 2 россиявидин гьалар къурху кутадайбур туш.
Къейд ийин, коронавирус Россияда пайда хьанвайдакай хабар чкIанай. Начагъбур сад — Забайкальеда, муькуьдини Тюмендин областда ава. Абур кьведни китайвияр я. Вирус чукIун тавун патал абур кьведни махсусдаказ чара авунва. Къейдзавайвал, уьлкведа вирус чукIунин къурху авач. Икьван чIавалди Россияда ихьтин вирусдикди инсанар азарлу хьайи дуьшуьшар малум туш.
Россиядин гьукумдарар Китайдин Ухань шегьерда авай россиявияр анай ахкъудунин ва абуруз талукь яз махсус серенжемар кьабулунин гьерекатрив гатIуннава. Москвади Монголиядал гьалтзавай часпардални къадагъа эцигдайвал я.
Эхиримжи делилралди, вирус саки 10 агъзур касдик акатнава, 200-далай гзаф инсанар кьенва, саки 200 кьван начагъбур тамамвилелди дири хъийиз алакьнава. Уьзуьр США-дивни, Великобританиядивни, Азиядин бязи уьлквейривни агакьнава. Малум тирвал, вирус садакай-садак акатдай хаталуди я.
США терефдар яз гьисабзава
Украинадин регьбер В. Зеленскийди уьлкведин аслу туширвилин гьалар хуьнин карда Вашингтон Киевдин кьилин терефдар хьайиди, тирди ва идалай кьулухъни хъжедайди малумарна. “ТАСС” чешмеди кхьизвайвал, ихьтин фикир украинвийрин регьберди США-дин госсекретарь М. Помпеодихъ галаз кьиле фейи гуьруьшдин нетижада малумарна.
Зеленскийди къейд авурвал, уьлкведин гьукумди США-дин президент Д.Трампан алахъунриз еке къимет гузва. Адан гафаралди, Украинадин рагъэкъечIдай пата авай алаш-булаш гьалар къайдадик кухтунин, ислягьвал арадал хкунин карда США-ди терефдарвалзава. Разивал малумарунихъ галаз сад хьиз, Зеленскийди хатасузвилин жигьетдай Вашингтондихъ галаз алакъаяр гегьеншарун патал Киев гьазур тирдини лагьана.
Къуватдай вегьена
1-февралдилай Россияда СССР-дин ва РСФСР-дин къанунрин 3700-далайни гзаф актар кардикай хкатна. Идакай “Новости” РИА-ди хабар гузва.
Гьукумдарри советрин девирдин къанунар къуватдай вегьедайдакай гьеле алатай йисан сентябрдиз раиж хьанай. Талукь тир документдал а чIаван премьер-министр Д.Медведева къул чIугунай. Къейд авурвал, бязи къанунри уьлкведиз экономикадин жигьетдай виликди финиз манийвал гузвай. Къуватдай вегьенвай къанунрикай сад кIвалахзавай ксари йикъан къене муьжуьд сятда кIвалахуниз талукьди тир.
Гуьгъуьнлай гьукумдарри гъавурдик кутурвал, муьжуьд сятда кIвалахуниз талукь къанун къуватда амукь тавуни алай аямдин россиявийриз пис патахъай таъсирдач, гьикI хьи, къуллугъдал алай касдин кIвалах давам хьунин муддат Зегьметдин кодексда тайинарнава.
Евросоюздай экъечIна
31-январдиз Великобритания Европадин Союздай экъечIна. Гьа са вахтунда уьлкведа гьасятда еке дегишвилер арадал къведач. Йисан эхирдалди ЕС-дин чIехи пай къанунар уьлкведа кардик кумукьда. Идакай “BBC News” чешмеди хабар гузва.
Великобританиядин премьер-министр Б.Жонсона уьлкве Евросоюздай экъечIун “цIийи девирдин сегьер” яз гьисабзава. Алай вахтунда ЕС-дик 27 уьлкве ква.
Хмеймимдал гьужумна
Боевикри Идлибдин сергьятрай ахъаяй пилот галачир аппаратри Сирияда авай Россиядин Хмеймим базадал гьужумна. Идан гьакъиндай мидявалзавай терефар баришугъ хъувунин рекьяй Россиядин центрадин регьбер Ю. Боренкова ихтилатна, хабар гузва “Новости” РИА-ди.
Адан гафаралди, агьвалат 1-февралдин йифен береда кьиле фена. Пилот галачир аппаратар радиоэлектронный женгерин такьатри кьуна. Гьужумдикди инсанриз хасаратвал хьанач, материалрин жигьетдай хьайи зиянарни авач.
Боренкова мадни хабар гайивал, боевикри суткадин къене Латакия, Алеппо, Идлиб ва Хама вилаятра инсанар яшамиш жезвай чкайриз 32 сеферда гуьлле гана.
Халкь тIимил жезвай регионар
Инсанрин кьадар виридалайни гзаф агъуз аватзавай Россиядин регионрин тIварар Росстатди малумарнава. Делилар “РГ” чешмеди раижна.
Ихьтин регионрик Саратовдин, Омскдин, Кемероводин, Волгограддин областар, гьакIни Алтайдин край акатзава. Кеферпатан Кавказдин, Центральный, Кьиблепатан, Уралдин ва Кефердинни РагъакIидай патан федеральный округра лагьайтIа, инсанрин кьадар артух хьанва.
Гьазурайди — К.Ферзалиев
