23-январдиз Мегьарамдхуьруьн  райондин Ярагъ-Къазмайрин школадин гуьрчег дараматда “Йисан муаллим-2020”  конкурсдин зональный пай вини дережада аваз кьиле фена. Махачкъаладай атанвай жюридин председатель, ДГУ-дин проректор, педагогикадин илимрин доктор М.Муслимова ва жюридин вири членар гзаф рази яз амукьна.

Иштиракчияр Къаякент, Сулейман-Стальский, Табасаран, Дербент, Кьурагь, Хив, Ахцегь ва Мегьарамдхуьруьн районрин муниципальный паюнин гъалибчияр тир.

Сифтедай конкурсантри чпин кIва­лахда ишлемишзавай методикадин къайдаяр, педагогвилин тежриба ва гьарда вичин кьетIен агалкьунар, алай вахтунин истемишунриз ­килигна, информациядин технологийрин ­куьмекдалди къалурна. Кьвед лагьай­ паюна ­конкурсантри ачух тарсар гана. Муаллим­вилин устадвилин и акъажунра сад лагьай чка  Мегьарамдхуьруьн  райондин  Совет­ский хуьруьн юкьван образованидин мек­тебдин урус чIаланни литературадин муаллим  Хасплатова  Эсфира  Эмиргьамзаевнади  кьуна.

Э.Хасплатовади кIвалахиз къад йис я. Ада коллективда, аялрин ва диде-бубайрин арада еке гьуьрмет къазанмишнава. Вич заведующий тир урус чIаланни литературадин кабинет ада писателрин ва шаиррин суьретралди, дуьньядин машгьур художникрин эсерралди, ОГЭ-диз ва ЕГЭ-диз аялар гьазурун патал герек материалралди тадаракламишнава.

Алай вахтунда Эсфира муаллим 9-классдин регьбер я. Тухузвай тарс аялриз хъсандиз чирунилай гъейри, адаз гьар са аялдихъ галаз рахадай кьетIен къайдаярни чида.

Ам кIвалахдив яратмишунардай тегьерда эгечIзава.

Э.Хасплатовади чи школада кьиле физвай вири мярекатра активнидаказ иштиракзава. Адан яратмишунрин рехъ тек са школадин къене сергьятламиш хьанвач. Эсфира му­аллимди дерин манадин шиирарни теснифзава ва маниярни кхьизва. Адахъ билбилдин хьтин ширин сес ава. И кар ада 11- классда С.Есенинан яратмишунрай тухвай “И манидиз рикIериз рехъ жагъида” тарсуна субутна. Тарс муаллимди Есенинан “Гьа­йиф жезвач, эверзавач, шехьзавач” романсдалди акьалтIарна.

Э.Хасплатовадиз  ашукьвилин бажарагъни ава. Аял чIавалай адан рикI саз ягъунал ала. Ам са шумуд конкурсдин гъалибчи я.  2017- йисуз Дербент шегьердин Нарын-къеледа кьиле фейи “Лезги сес” мярекатда ада ашукь Айдунахъ галаз санал иштиракна ва гъалибвал къачуна.

ТуькIвей хизанда Эсфира муаллимди вичин кьуд велед лап хъсандиз тербияламишзава.

Мегьарамдхуьруьн райондин Советский хуьруьн мектебдин коллективди Эсфира Эмиргьамзаевнадиз и гъалибвал рикIин сидкьидай мубаракзава! Къуй адахъ гележегда мадни еке агалкьунар хьурай!

Л.Султанова, Советский хуьруьн

мектебдин лезги чIалан ва

литературадин муаллим