Сулейман-Стальский райондин Вини СтIалрин умуми образованидин мектебда республикадин “Хайи чIалан виридалайни хъсан муаллим — 2020” конкурсдин районда жезвай пай кьиле фена, хабар гузва райондин cure-online сайтди.
Мярекатдин тешкилатчи тир Сулейман-Стальский райондин “ИМЦ” МКУ-дин методист Назират Мегьамедовади къейд авурвал, конкурсдин макьсад хайи чIаларин муаллимрик яратмишунрин жигьетдай гьевес кутуникай, абурун пешекарвилин бажарагъ хкажуникай, виридалайни хъсанбур хкягъуникай, абурун педагогвилин тежриба раиж авуникай, хайи чIалаз итиж авун артухаруникай ва икI мад ибарат я.
Жюридик райондин образованидин управленидин начальникдин заместитель Къачабег Аминов, “ИМЦ” МКУ-дин директор Муминат Бабаханова, чIалан ва литературадин муаллимар тир Гуьзел Межидова, Анжелика Шихрагьимова ва Жамиля Жигерова квай.
Муниципалитетда жезвай пай кьве дережадинди тир: “Методикадин семинар” ва “КIелунин тарс”. Конкурсдал муаллимри чпин кIвалахдикай фикир желбдай жуьреда суьгьбетна, пешекарвилин ерияр ва яратмишунрин бажарагъ къалурна.
Районда кьиле фейи конкурсдин кьве паюнин нетижайралди 1-чкадиз — ЦIийи Поселокдин мектебдин муаллим Зурият Султанагьмедова, 2-чкадиз — ЦIийи Макьарин мектебдин муаллим Диана Мегьамеднабиева ва 3-чкадиз Агъа СтIал-Къазмайрин мектебдин муаллим Багьаят Салигьова лайихлу хьана.
Зурият Султанагьмедовади “Хайи чIалан виридалайни хъсан муаллим — 2020” конкурсдин республикада жезвай паюна иштиракда.
«Лезги газет»
