Тар — дувулралди, Дагъустан чIала­ралди девлетлу я

20-январдилай 1-февралдалди чирвилерни тежриба хкаждай институтда лезги, дарги ва авар  чIаларинни литературайрин муаллимар патал курсар кьиле фена. И курсара Докъузпара, Мегьарамдхуьруьн, Сулейман-Стальский, Хив, Дербент районрин ва Дагъустандин Огни, Махачкъала, Каспийск шегьеррин мектебра лезги чIаланни литературадин тарсар гузвай 11 муаллимди иштиракна.

Институтдин  филологиядин кафедрадин лезги чIалан кьилин пешекар Таймурова Нагима Мегьамедовнади курсариз атанвай муаллимар патал лезги чIа­лай ва литературадай менфятлу тарсар, мастер-классар, жуьреба-жуьре  къугъунар, кроссвордар, чирвилер ахтармишдай тестер тухвана. И карда куьмекдин жуьреба-жуьре техника, алатар ишлемишна. Курсара муаллимри гьар жуьредин проектар, презентацияр,  къугъунар гьазурна ва къалурна, докладар авуна.

Курсар  лезги, дарги ва авар чIала­рин методикайриз талукь семинар тухуналди   акьалтIарна. Анал и чIаларай мастер-классар къалурна. Лез-ги чIалай мастер-класс КьепIир-Къаз­майрин юкьван мектебдин дидед чIа­лан ва литературадин муаллим Зульфия Эмирхановади къалурна. Ада “Глагол” темадай презентациядин слайдар ишлемишна. Семинарда иштиракай вири чIаларин муаллимрив сертификатар вахкана. Му­аллимри и курсар разивилелди акьал­тIарна.

Магьият  Жаруллаева,

Ярагъ-Къазмайрин юкьван мектебдин

дидед чIалан ва литературадин муаллим