Къудратлу СССР чкIайдалай инихъ зегьметдин къадир чидайбурун жергеяр кьери хьана. Эгер Советрин девирда обществодиз хийир авай зегьмет вирида саналди, гьевеслувилелди тамамарзавайтIа, алай аямдин инсанар и кардив къайгъусузвилелди эгечIзава ва я иллаки эгечIзавач.
Хуьруьн чкада яшамиш жезвай инсанрал четин тIимил месэлаяр расалмиш жезвач: рекьера яд гьатзава, ана вирер арадал къвезва ва масабур. Докъузпара райондин Къаракуьре хуьруьн Мирза Велиеван тIварунихъ галай куьчеда яшамиш жезвай агьалияр Э.Гьажибегова, С.Мегьамедшафиева, Ф.Агъадашева, К.Шамурханова, А.Агъасиева, С.Мусабегова чпин куьче авай гьал гьамиша гуьзчивилик хуьзва. Алатай гьяд юкъуз винидихъ тIварар кьунвай ксари, зегьметдин алатар гъилик кьуна, хуьруьн мектебдихъ физвай рехъ къайдадиз хкана. Чиркин ятар кIватI жезвай къанавар зирзибилдикай михьна, рекьериз, пулдихъ машин кьуна, шим чукIурна, ятар авахьдай хвал туькIуьрна. Винидихъ тIварар кьунвай ксари чпин куьчедин къулайвал, тартиб хуьниз къуллугъзава. Умудлу я, абурун мергьяматлу кIвалахрилай акьалтзавай ва алай вахтунин жегьилрини чешне къачуда. И месэлаяр маса тегьерда гьялиз жедай рехъ амукьзавач.
Эдуард Гьажибегов,
“ЭС” газетдин кьилин редактор
