Техника, илим йигин еришралди вилик физвай шартIара обществода электричестводин метлеблувал мадни артух жезва. Электросетра датIана лазим тир 240 вольтдин напряжение хуьн патал чкайрал алай электротрансформаторар ара-ара гужлубуралди, цIийибуралди эвезунин лазимвал жезва.
Ингье, и мукьвара Ахцегьрин “Мукьтадиран колхоздин” гьаятда авай 1000 кВА-дин электротрансформатор 2500 кВА — дин гужлувал авайдалди эвезна.
— Фадлай кIвалахзавай куьгьне электротрансформотордилай жемятдин (адак Ахцегьрин са магьледин, Калукрин, Къутунхъарин, КьакIарин, Хуьруьгрин, Ялахърин жемят ква) югъ-къандавай артух жезвай игьтияжар таъминариз жезвачир. Наразивилерни шикаятар арадал къвезвай. Ахцегь ва Рутул районрин кьилерин теклифдалди, чна игьтият патал хуьзвай чи, вич хъсан гьалда авай, гужлу трансформатор (адан кьимет 1,5 миллион манат я) эцигзава. И кардай заз, эвелимжи нубатда, месэла къарагъарай Ахцегь ва Докъузпара районрин регьберриз ва и теклиф кьабулай Дербентдин электросетрин начальник Марат Ягьяеваз, управляющий директор Муртуз Гитинасуловаз, подстанцийрин къуллугъдин начальник Наврузбег Рамазановаз (ингье, ада вичин бригадани галаз атана, гьакъисагъвилелди кIвалахзава) сагърай лугьуз кIанзава.
И трансформатор кардик акатуникди Самур дередин винидихъ тIварар кьур хуьрерин агьалияр токдалди таъминарунин месэла гьялна куьтягьзава. Гила чи вилик Хинерин дередин хуьрерин месэла ква. Ана трансформатор, токдин шалманар хъсан гьалда авач. Алай вахтунда райондиз 16 агъзур кВА-дин къуват авай чIехи электротрансформатордин чарасузвал ава. Ам къачуна эцигуник, гьелбетда, республикадин руководстводин ва энергокъурулушдин куьмек галачиз, чи такьат акакьдач. Шехь тавур аялдиз нек гудач лугьудай мисал ава. И кар кьилиз акъатун патални чун вахтунда къайгъудик хьана кIанда, — Ахцегь райондин руководстводиз теклиф яз лагьана Дербентдин электросетрин производстводин участокдин кьилин инженер, чи ватанэгьли Гьажи Керемова.
Ихтилат кватай чкадал къейд ийин, гзаф йисара намуслувилелди Ахцегьрин РЭС-дин начальниквиле кIвалахай вини дережадин пешекар Гь.Керимов и мукьвара Дербентдин электросетрин кьилин инженервиле тайинарнава. И жавабдар чIехи къуллугъ чна адаз рикIин сидкьидай мубаракзава.
Дашдемир Шерифалиев
