РД-дин Кьилин ва Гьукуматдин Администрациядин пресс-къуллугъди “Лезги газетдиз” хабар гайивал, 27-январдиз Дагъустандин Сад лагьай вице-премьер Анатолий Къарибован регьбервилик кваз “Здравоохранение” милли проект уьмуьрдиз кечирмишунай проектный комитетдин заседание кьиле фена.
Къенин юкъуз Дагъустанда “Здравоохранение” милли проектдин сергьятра аваз региондиз талукь 7 проект кьилиз акъудзава. Гьа гьисабдай яз министерстводи гуьгъуьнин йисарани кьилин фикир гун давамардайбурун ва гьеле исятдани гузвайбурун арада медико-санитарный куьмекдин сифтегьан хел вилик тухун, рикIинни дамаррин ва онкологиядин азаррихъ галаз женг чIугун, аялрин здравоохранение вилик тухун, медицинадин идараяр пешекар кадрийралди таъминарун, здравоохраненида рекъемрин сад тир кIалуб арадал гъун ва медицинадин къуллугърин экспорт вилик тухун ава.
ИкI, регионда 2019-2024-йисара кьилиз акъуддай проектриз санлай къачурла серфдай такьатри 20 миллиардни 466 миллион манат тешкилзава. Мукьвал йисара Дагъустандин поликлиникаяр кIвалахдин цIийи къайдадал элячIун лазим я. Идаз талукь яз медико-санитарный куьмек хъсанарун патал са жерге серенжемар кардик кутунва. Абурун макьсад авунвай куьмекдал азарлу рази хьун ва медико-санитарный гьар са участокда кьиникьин дуьшуьшар тIимиларун я.
2019-йисуз проект кьилиз акъудунин сергьятра аваз Дагъустанда цIийи 20 ФАП эцигна, гьа гьисабдай яз абурукай 5 — такьатар кьенятдивди ишлемишунин нетижада. Здравоохраненидин министрди къейд авурвал, медицинадин и идараяр сифте сефер яз лазим вири тадаракралди таъмин я.
Аялрин здравоохранение вилик тухунин программадик абуруз медицинадин куьмек гун патал алай аямдин инфраструктура арадал гъун ква. Проект педиатрияда азаррин вилик пад кьунин хел вилик тухунихъ, алай аямдин технологияр уьмуьрдиз кечирмишунихъ, аялрин поликлиникайрин материально-технический база хъсанарунихъ, абур алай аямдин тадаракралди таъминарунихъ, аялар патал азарханаяр эцигунихъ ва цIийикIа туьхкIуьр хъувунихъ ва икI мад элкъуьрнава.
Чи регионда рикIинни дамаррин ва онкологиядин азаррихъ галаз женг чIугвадай проектрин кьилин макьсад и азаррикди кьиникьин дуьшуьшар тIимиларун я. Республикадин стационарра чIуру дакIунрикди азарлу тирбур патал койкайрин кьадар артухарда. Идалайни гъейри, 2022-йисалди медицинадин 4 идарадин патав онкологиядин хиляй куьмекар гун патал амбулаториядин центраяр ачухун пландик ква.
Медицинадин къуллугъчийрин пешекарвал хкажунизни кьилин фикир гузва. Регионда здравоохраненидин къурулушдин идараяр пешекар кадрийралди таъминаруниз талукь яз кьилиз акъудзавай проектди республикадин медицинадин идарайра авай кьитвал алудуниз ва духтуррин пешекарвилин дережа хкажуниз куьмекда. ИкI, 2019-йисуз Дагъустанда “Земский духтур” программадин бинедаллаз 224 духтур ва 10 фельдшер кIвалахал эцигнава.
«Лезги газет»
