Виликрай Дагъустандин писателрин Союзда литературадин бюро кардик квайди тир. Ада шаиррин, писателрин яратмишунар хуьрера, шегьерра, хуьруьн майишатдин кIвалахар кьиле физвай багълара, бустанра, яйлахра, югарар гатазвай чкайрал, зегьметкешрин арада, гьакI заводрин цехра раижзавай, инсанрив агакьарзавай.
Са сеферда зунни гьахьтин са десте шаиррихъ галаз Кьурагь райондиз мугьман хьанай. Кьуьчхуьррин колхоздин председателди чун вичин багърияр хьиз кьабулнай. Ада чун колхоздин виликдай техил хуьдай складдин патав тухвана, адан цлар къалуриз, вичин суьгьбет башламишнай:
— И кIвалера Ашукь Саид хайиди я. И цлара зурба шаирдин руьгь ама…
Мадни Агъабалаев Имамедина шаирдикай, адан яратмишунрикай чаз течир са бязи малуматарни ганай. И чIавуз за адаз «Коммунист» газетдин редакцияда кIвалахзавай художник Азизов Абид халудин кIвале Ашукь Саидан къаматдин эскизар авайдакай лагьанай. Са кьадар вахт фейила, Кьуьчхуьррин колхоздин председатель вичин кассирни галаз, колхоздин правлениди акъуднавай къарарни гваз зи патав мугьмандиз атанай. Адан мурад колхоздин идарада машгьур шаирдин портрет хьун тир.
Абид халудиз шаирдин къамат-портрет гьазурун заказна, пулни гана, ам хъфенай. Художникди заказ тамамарнай. Идалай гуьгъуьниз Абид Азизова Етим Эминан шикилни арадал гъанай.
А вахт колхоздин гьар са кепек ревизоррин гуьзчивилик квайди тир. Имамедин Агъабалаева колхоздин пул ихьтин рекьериз харжна лугьуз, райкомдай адаз гафни атанай. Лезги ва гьакI маса миллетрин шаирриз яратмишунрин рекье гьамиша куьмекар гузвай кас тир Имамедин Агъабалаеван руьгь шаирдин руьгьдиз мукьва я. Сагърай вич.
Бикеханум Алибегова
