“Лезги газетдин” алай йисан 42-нумрадиз акъатнавай “Гьакъикъат арадал хкун патал” макъаладиз культурадин “Куьредин ярар” центрадин патав кардик квай “Литературадин экспертный комиссиядин” жаваб.
Макъалада Фазила Абасовади ЦIийи Макьарин хуьруьн мектебдин муаллим Рабият Мансуровади, 1990-йисуз “Коммунист” газетдиз акъатай вичин макъаладай къачунвай чIук, чиз-чиз, вичин тIвар алаз “Куьредин ярар” журналда чапнава лугьуз, адак тахсир кутазва.
Гьакъикъатда лагьайтIа, Р. Мансуровади вичин макъалада ишлемишнавай чIук (кIуьд предложение) 6-7-классрин “Лезги чIал” ктабдин 2-тапшуругъдай къачунва ва абур Кьасумхуьрел кьиле фейи лезги чIалаз талукьарнавай конференциядин докладдик кутуна. И ктабда тапшуругъда ишлемишнавай гафар Ф.Абасовадинбур я лагьана тестикьарнавач, анал (Г) гьарф эцигнава (яни “Газетрай”). Р.Мансуровадиз тапшуругъда авай гафар, фикирар вичин тарсара, докладра ишлемишдай вири ихтияр ава.
“Куьредин ярар” журналдиз ганвай чIук А.А.Тахо-Годидин тIварунихъ галай илимдинни ахтармишунрин педагогикадин институтди акъуднавай хайи чIаларин международный йикъаз талукьарна 2016-йисуз кьиле фейи конференциядин материалрин кIватIалда гьатнавай Р.Мансуровадин докладдай къачунвайди я.
ГьакI ятIани, Ф.Абасовадин тIалабуналди, “Куьредин ярар” журналдин редакцияди журналдин нубатдин нумрада винидихъ къейднавай чIукунин автор ам тирди тестикьарнава.
Гьуьрметлу Фазила Абасова! Куьне лезги чIалакай са мус ятIани лагьанвай фикирар, дугъриданни, маналубур ва таъсирлубур я. Гьавиляй Р.Мансуровадиз ва чаз лезги чIал хуьнин карда абурукай менфят къачун дуьз яз акуна. 27 йис идалай вилик газетдиз акъатай куь макъаладикай я Р.Мансуровадиз, я чаз хабар авачир. Абур, винидихъ къейд авурвал, учебникдай къачуна. Ана куь тIвар къалурнавач. Учебникра газетрин макъалайрин авторрин тIварар кьазвач, “Г” къул алаз чапзава.
Агьмедпаша Агьмедпашаев,
культурадин “Куьредин ярар” центрадин комитетдин регьбер
