17-ноябрдиз Мегьарамдхуьруьн Культурадин кIвалин зал сиве-сивди инсанрив ацIанвай. Абур Дагъустандин халкьдин писатель, республикадин искусствойрин лайихлу деятель Абдуселим Исмаилован 70 йисан юбилейдиз талукьарнавай мярекатда иштиракиз атанвайбур тир.
Нисинин сятдин кьвед тамам хьайила, сегьнедиз, япара зуьрнечийри язавай авазрин ван аваз, межлисдин кьилин игит Абдуселим Исмаилов ва Лезгийрин СтIал Сулейманан тIварунихъ галай театрдин кьилин режиссер, Дагъустандин халкьдин артист Мирзебег Мирзебегов хкаж хьана. Театрдин актер, Дагъустандин лайихлу артист Руслан Пирвердиева шаирдин юбилейдиз талукьарнавай мярекат ачухнавайди малумарна ва гаф Мегьарамдхуьруьн райондин кьилин сад лагьай заместитель Гьабибуллагь Мурадалиеваз гана. Вичин рахунра ада Абдуселим Исмаилован яратмишунрин кьилин терефрикай, лезги эдебиятдин вилик адан лайихлувилерикай, хайи чIал хуьнин ва еримлу авунин карда шаирди чIугвазвай зегьметдикай суьгьбетна. Гуьгъуьнлай Гь.Мурадалиева гафунин устаддиз райондин кьил Фарид Агьмедован патай юбилей тебрикна ва адав тебрикдин телни пулдин пишкеш вахкана.
Бажарагълу шаир, гьикаятчи, драматург, публицист, таржумачи Абдуселим Исмаилов тебрикун патал и юкъуз Мегьарамдхуьруьн райондиз Махачкъаладай, Дербентдай, Кьиблепатан Дагъустандин районрай алимар, общественный деятелар, шаирар, артистар, композиторар, журналистар, милли эдебиятдал рикI алай хейлинбур атанвай. Абурун арада Дагъустандин халкьдин шаир, “Кард” журналдин редактор Ханбиче Хаметовани авай.
Вичин рахунра Х.Хаметовади халис шаир хьун патал са шумуд шартI авайди ва абур вири Абдуселим Исмаилова кьилиз акъуднавайди къейдна. “Абдуселим Исмаилов чIехи писатель я. Ада вири жанрайра бегьерлудаказ кIвалахзава. Шаирдин яратмишунрин алем девлетлуди ва фикир желбдайди я… Заз зи къелемдин дустунихъ мадни еке агалкьунар ва сагъламвал хьана кIанзава”, — лагьана Дагъустандин халкьдин шаирди.
Гуьгъуьнлай юбилярдин тIварцIихъ тебрикдин гафар философиядин илимрин доктор Салигь Муслимова, педагогикадин илимрин кандидат Исламудин Гьуьсейнова, “Лезги газетдин” кьилин редактор Мегьамед Ибрагьимова, Лезгийрин театрдин директор Динара Эминовади ва кьилин режиссер Мирзебег Мирзебегова, РФ-дин культурадин лайихлу къуллугъчи Фетягь Къурбанова, шаирар Зульфикъар Къафланова, Шагьвелед Шагьмарданова, композитор ва таржумачи Мурад Саидова, Уружбайрин хуьруьн агьалийри, муаллим ва шаир Айна Шалбузовади, Мегьарамдхуьруьн администрациядин пресс-центрадин регьбер Гуьлмира Закуевади ва масабуру лагьана.
Мярекат гурлуди хьуник Лезгийрин театрдин коллективди иллаки еке пай кутуна. Театрдин актерри Абдуселим Исмаилован пьесайрай эцигнавай сегьнеяр къалурна, шиирар кIелна, адан чIалариз кхьенвай манияр тамамарна. Абурун арада РФ-дин лайихлу артист Абдуллагь Гьабибов, Дагъустандин халкьдин артисткаяр — Зерифа Къухмазовани Фаризат Зейналова ва масабур авай.
Шаирдин юбилейдин межлисдин сергьятра аваз Мегьарамдхуьруьн райондин администрациядин культурадин отделдин къуллугъчияр тир Билал Эскендарова, Седакъет Саидовади манияр тамамарна, Мегьамед Гьажиеван тIварцIихъ галай мектебда кIелзавай аялри юбилярдин шиирар кIелна.
Мярекатдин эхирдай гаф Абдуселим Исмаиловаз гана. Ада межлис тешкилайбуруз, вичин тIварцIихъ тебрикдин гафар лагьайбуруз ва вири иштиракчийриз сагърай лагьана.
Къейд ийин: Абдуселим Исмаилован 70 йисан юбилейдиз талукьарнавай мярекатар йисан эхирдалди Сулейман-Стальский районда, Дербентда, Махачкъаладани кьиле тухуда.
Агьмед Магьмудов
