15-январдиз Урусатдин Президент Владимир Путин нубатдин сеферда Чар гваз Федеральный Собранидин вилик экъечIна.
Уьлкведин регьберди вичин Чарче уьмуьрдин жуьреба-жуьре хилера кьиле фидай дегишвилерикайни лагьана. Кьилди къачуртIа, ада алай йисан 1-сентябрдилай мектебра классрин руководителрин мажибрал федеральный бюджетдин такьатрин гьисабдай 5000 манатдин кьадарда аваз махсус алава хъувун теклифна.
Дидевилин капиталдикай рахадайла, Президентди 2020-йисан 1-январдилай капиталдин сертификат (466 агъзур манат) хизанда сад лагьай аял хьайила гудайди, кьвед лагьай аял хьайила, адан кьадар 150 агъзур манатдин артух жедайди (616 агъзур манат) къейдна. И программа 2026-йисан 31-декабрдалди давам жеда.
Мадни Владимир Путина мектебра 1-4-классра кIелзавай вири аялар пулсуз чими хуьрекралди таъминарун, къазанжияр яшамиш хьунин такьатрин агъа кIанин кьадардилай гзаф тушир хизанра 3-7 йисарин яшара авай аялриз гьар вацра пулдин такьатар чара авун теклифна.
«Лезги газет»
