Машгьур журналист, ДГУ-дин журналистикадин отделенидин муаллим, чи баркаллу ватанэгьли Алик Абдулгьамидов 2019-йисуз массовый информациядин такьатрин хиляй Урусатдин Гьукуматдин премиядин лауреат хьанвайдакай чна газетдин виликан нумрада хабар ганвай. 13-январдиз Москвада РФ-дин Гьукуматдин Председатель Дмитрий Медведева шадвилин гьалара уьлкведин журналистрив шабагьар вахкана. Абурун арада Алик Абдулгьамидовни авай.

Къейд ийин хьи, ам СМИ-рин хиляй Россиядин Гьукуматдин премия ганвай дагъустанви журналистрикай сад лагьай кас я. Абдулгьамидоваз и чIехи шабагь жуьрэтлувиляй, журналистикадин хилек кьетIен пай кутунай ва жемиятдин вилик лайихлувилерай ганва.

Мярекатдин эвел кьиляй Дмитрий Медведева кIватI хьанвайбуруз пешекарвилин сувар — Урусатдин печатдин югъ тебрикна, журналистрихъ чандин сагъвал, яратмишунрин рекье агалкьунар хьун алхишна.

— Журналистдин пеше четинбурукай сад я, — лагьана Д.Медведева. — Абурун везифа тек са уьлкведа авай месэлайрикай хабар гун туш. Журналистри абур гьялун нелай аслу ятIа, гьабурни гьерекатдик кутуна кIанзава. Сифте нубатда — гьукум. Къе чна шабагьар вахкузвайбурун ара­да гьа ихьтин инсанарни — газетрин чин­рал гражданвилин жемиятдин тIвару­ни­хъай яшайишдин жигьетдай важиблу теклифар гваз экъечIзавайбурни ава.

Халкьдин гегьенш къатар кIелунал, искусстводал желб авун патал илимдин кIвалахрал машгъул жезвай журналистарни ава. Урусатдин Гьукуматдин премиядиз лайихлу хьанвайбур вири яшарин инсанриз чизва — аялризни, университетра кIелзавайбурузни, уьмуьрдин чIехи тежриба хьанвайбурузни, — алава хъувуна Дмитрий Медведева.

Гуьгъуьнлай ада лауреатрив шаба­гьар вахкана. Агалкьунар къейд авур хейлин журналистри уьлкведа кьиле физвай ва-къиайрикай, СМИ-ри жемиятдин уьмуьрда кьунвай чкадикай ва са жерге маса месэлайрикай чпин фикирар лагьана, къелемдин юлдашриз пешекарвилин сувар тебрикна.

Вичиз ганвай шабагьдиз баянар гудайла, ФЛНКА-дин мухбирдихъ галаз кьиле фейи интервьюда Алик Абдулгьамидова къейдна: “Зегьметдиз къимет гун хуш жедай кар я. Ришветбазвилихъ, экологиядихъ, Самурдин тамухъ, республикадин карчийрин уьмуьрдихъ галаз алакъалу кIвалахриз уьлкведин гьукуматдин дережада къимет гун важиблу делил я. И къиметди макъалаяр чап авур региондин аслу тушир СМИ-ризни куьмек гузвайдан гьакъиндай шагьидвалзавайдак за умуд кутазва…”

Машгьур журналистдин фикирдалди, регионрин СМИ-риз чкадин гьукумди куьмек гуз хьайитIа, и кардикай еке хийир хкатда. Аслу тушир изданийра чапзавай макъалаяр фикирда кьуна, гьукумдивай чпин планрик, кьабулзавай къараррик дегишвилер кухтаз, нетижада гьукумдин, жемиятдин, СМИ-рин, экспертрин, жергедин агьалийрин арада менфятлу диалог арадал гъиз жеда.

Лагьана кIанда, 2019-йисуз Алик Абдулгьамидов уьлкведин дережада аваз кьиле фейи са шумуд конкурсдани гъалиб хьана. Мисал яз, сентябрдин вацра кьиле фейи прессадин “Вири Урусат” фестивалда­ ада 1-чка кьуна. И мярекатда, санлай къачурла, жуьреба-жуьре регионрай тир 1200 журналистди иштиракна. Гатфарихъай чи машгьур ватанэгьлидикай ОНФ-ди кьиле тухвай “Гьакъикъат ва адалатлувал” конкурсдин лауреат хьана. ЦIийи йисан вилик Махачкъалада кьиле фейи прессадин Балдин сергьятра аваз адав Урусатдин журналистрин Союздин гьуьрметдин “Намус, лайихлувал ва пешекарвал” знак вахкана.

Алик Абдулгьамидов Ярагърин хуьряй я. Ада Ростовдин госуниверситетдин журналистикадин факультет акьалтIарна. Жуь­реба-жуьре йисара “Дагъустан” ГТРК-да­, 1-каналда хсуси мухбир яз зегьмет чIу­гуна.

2014-йисалай Махачкъаладин гьуьлуьн алишверишдин портунин директордин СМИ-рихъ галаз алакъаяр хуьнин ре­кьяй куьмекчи яз кIвалахзава. Гьа са вахтунда ДГУ-дин журналистикадин отделенида тарсарни гузва.

Ам региондин журналистика вилик тухудай “Каспий-медиа” центрадин руководителдин заместитель, ОНФ-дин Да­гъустанда авай штабдин член я.

Алик Абдулгьамидов Дагъустандин алай аямдин журналистикада чIехи кесер ва гьуьрмет авай пешекаррикай сад яз гьисабзава.

“Лезги газетдин” редакциядин коллективди чи баркаллу ватанэгьлидиз Урусатдин Гьукуматдин премия мубаракзава, мад сеферда адахъ чандин сагъвал, мадни еке агалкьунар хьун алхишзава.

Мегьамед Ибрагьимов