Сулейман-Стальский райондин муниципалитетдин кьил Нариман Абдулмуталибов инстаграммдин официальный чинай ачухдиз, арада масад авачиз райондин агьалийрихъ галаз рахана. Райондин агьалийрихъ галаз и жуьреда ам кьвед лагьай сеферда эфирдиз экъечIзава. Идан гьакъиндай “Лезги газетдиз” муниципалитетдин пресс-къуллугъди хабар гана.
Къейд авун лазим я хьи, и жуьредин суьгьбет райондин общественностдин тIалабуналди тешкилайди я. Кьуд юкъуз инстаграммдин официальный чиниз 240-далай виниз суалар, теклифар, тIалабунар авай чарар атана. Агьалийрик иллаки образованидиз, здравоохраненидиз, ЖКХ-диз, АПК-диз, экономикадиз, кIвалахдал таъминаруниз, коррупциядиз, спортдиз, газдалди, электроэнергиядалди таъминаруниз, рекьериз, яшайишдин хилериз ва культурадиз талукь месэлайри секинсузвал кутазва.
Са сятни яхцIурни цIуд декьикьада райондин кьили агьалийрин суалриз жавабар гана. Вичин нубатда ада райондин месэлайрив къадирлувилелди эгечIзавай, кIвалахар вилик тухун патал теклифар гузвай, бязи чкайра рехъ гузвай кимивилер къалурзавай агьалийриз сагърай лагьана.
Гьайиф хьи, технический мумкинвилер ва вахт тIимил тирвиляй агьалийрин вири суалриз жавабар гуз агакьнач. Абур Н.Абдулмуталибова къейднава ва вичин гуьзчивилик кутада.
«Лезги газет»
