Улакьар гьалзавайбур секин жедатIа?

Россиядин МВД-ди 20-40 километрдиз са сятда финин йигинвал аваз гьалзавай улакьчийриз талукь жерме 6 сеферда артухарун теклифзава. Идакай “Новости” РИА-ди хабар гана.

Икьван чIавалди 500 манат тиртIа, гила жермедин кьадар 3 агъзур манат жеда. И делилар рекьерин гьерекатрин хатасузвилиз талукь махсус комиссиядин материалра къалурнава. Документда тестикьарнавайвал, эгер улакь гьалзавай касди йигинвал кьвед лагьай сефердани къанунда къалурнавай кьадардилай артухарайтIа, а чIавуз жермедин кьадар­ 5 агъзур манатдиз барабар жеда. 40-60 километрдиз улакь са сятда фи­нин йигинвал аваз гьалзавайбуруз талукь жермени тахминан кьуд сеферда артухардайвал я, адан кьадар 4 агъзурдав агакьда. Эгер къанун­сузвал кьвед лагьай сеферда тикрар хъувуртIа, жермедин кьадар 8 агъзурдав агакьда ва я шофер праводикай магьрумда. Алай вахтунда и къа­нундал амал тийизвай шоферриз къвезвай жаза кьве агъзур ва я кьве агъзурни вад виш манатдин жерме авуникай ибарат я.

МВД-ди са сятда 60 километрдилай  гзаф мензилдиз фидай улакьдин йигинвал кьадардилай артухарунай къвезвай жермейрин арада тафават тун тавун ва сад тир жаза тайинарун теклифна. Малумарайвал, жаза 5 агъзур манатдин жерме авуникай ва я улакьчи 4-6 вацра праводикай магьрумуникай ибарат жеда. Тахсиркарвал мад сеферда тикрар хъу­вуртIа, жермедин кьадар 10 агъзурдав агакьда, гьакIни улакьчи са йисан муд­датда праводикай магьрум хьун мумкин я.

ЦIийи женгер

Сириядин яракьлу кьушунри Идлиб вилаятда женгинин цIийи гьерекатдик кьил кутунва. Идакай “Новости” РИА-ди малумарна.

Къейдзавайвал, гьукуматдин кьушунрихъ са кьадар агалкьунарни хьанва: къати женгерин нетижада абуру Умм-Жаляль хуьр гуьзчивилик кутуна. Чешмедин делилралди, женгинин цIийи серенжемар кьиле тухуз кIанзавай чкада террористар мягькемдаказ акъвазнава.

17-декабрдиз терефар баришугъ хъувунин Россиядин центрадин регьбер, генерал-майор Ю.Боренкован гафаралди, Сириядин яракьлу кьушунривай кьве вилаятда боевикрин са шумуд гьужум кьулухъди алу­диз алакьна.

Киев рази хьана

Украинадин тIебиат хуьнин ва энергетикадин министр А.Оржела малумарайвал, Москвади ва Киевди Россиядин газ Европадиз акъудунин къимет хкажунин чарасузвал аннамишзава. Идакай “Интерфакс” чешмеди хабар гана.

“Гьакъикъатдив кьазвай къимет газдин кьадардилай аслу яз, гьакIни къимет тайинарунин Европадин къайдайрал амал авуналди, регуляторди тайинарда”, — къейдна министрди.

Идалай вилик “Газпром” тешкилатдин регьбер А. Миллера газ санай масаниз акъудунин барадай Россиядинни Украинадин арада хьанвай икьрардин куьлуь-шуьлуь месэлаярни раижна. Адан гафаралди, кьве терефни цIийи наразивилер кьабул тавунин, гьакIни арбитраждин ва суддин гьерекатар кьулухъди элкъуьр хъувунин фикирдал атана.

Жаваб гуда

РФ-дин къецепатан крарин министр Сергей Лаврова къейд авурвал, США-ди малумарнавай са жерге санкцийриз Россияди вичиз зарар тежедай жуьреда жаваб гуда. Идан гьакъиндай “Интерфакс” чешмеди хабар гузва.

Малум тирвал, Россиядин “Северный поток-2” ва “Турецкий поток” газопроводриз акси санкцияр Америкадин оборонадин 2020-йисан бюджетдик  кутунва. США-дин президент Д.Трампа санкцийрин гьакъиндай къарар акъудайдалай кьулухъ Швейцариядин “Allseas” тешкилатди “Северный поток-2”-да кIвалахар акъва­зарна.

С.Лаврова къейд авурвал, сергьят эцигнавай серенжемриз килиг тавуна, кьве газопроводни и йикъара кардик акатда.

Лекьенди гьужумна

Индиядин Уттар-Прадеш штатда куьчедал къугъвазвай аялрал лекьенди гьужумна. Идакай “Daily Mail” чешмеди хабар гузва.

Вад йисан яшда авай Четаназ ва адан дуст, кьуд йиса авай Нишудиз гьужумдиз къвезвай вагьши акуна, хаталу макъамда абуру куьмекдизни гьарайна, амма вахтунда касни агакьнач. Вагьши гьайванди аялрал хкадарна, сифте Нишудал хер авуна, ахпа Четан кьуна ва катна.

Гардандал хер хьайи Нишу азарханадиз агакьарна. Кьве югъ алатайдалай кьулухъ чкадин агьалийриз Четанан мейит жагъана. Вагьшиди аял, кIус-кIусна тIуьнвай, амукьаяр хуьруьвай 300 метрдин яргъа авай майдандал аламай.

Къейдзавайвал, им Уттар-Прадеш штатда кьве йикъан къене лекьенди инсанрал гьужумнавай кьвед лагьай дуьшуьш я. Маса хуьре лекьенди аялдал гьужумдайла, адан багърийрилай мусибатдин вилик пад вахтунда кьаз алакьна.

Индияда аялрал лекьенри гьужумзавай дуьшуьшар гзаф жезва. Январдин вацра лекьенди кьуд варз тамам хьанвай таза аял тухванай. Аялдин хизан малдарвилел машгъул тир. Абуру бицIек чеб яшамиш жезвай чкадин патав михьи гьавадал ксурнавай.

Гьазурайди — Куругъли Ферзалиев