Алатай йисан 13-декабрдиз Хасавюрт райондин Къурушрин хуьруьн 1-нумрадин юкьван школада писатель, таржумачи, СтIал Сулейманан тIварунихъ галай премиядин лауреат Гьажиев Межид Жарасович дидедиз хьайидалай инихъ 90 йис тамам хьуниз талукьарнавай шадвилин мярекат кьиле тухвана.
Ана иштиракун патал писателдин стха, зари Гьажиев Маликаз, гзаф йисара школада урус чIаланни литературадин тарсар гайи шаир Хидиров Шагьназараз, 1-нумрадин юкьван школадин тербиядин рекьяй директордин заместитель Велиметов Мегьамедаз, лезги чIаланни литературадин муаллимар тир Мамедов Элескераз, Гьасанов Сейфуллагьаз, Дадашева Эрзидиз ва маса юлдашриз теклифнавай.
Межид Гьажиеван уьмуьрдин ва яратмишунрин рекьерикай Дагъустандин лайихлу муаллим, и цIарарин иесиди гегьенш доклад авуна, адан эсеррин кьилин игитрикай суьгьбетна. Ш.Хидирова вичи гьеле Дагъустандин госуниверситетда кIелдай йисара Межид Жарасовичахъ галаз хьайи гуьруьшрикай, вичин эсерриз ада къимет гайивиликай ва шиирар кхьидай цIийи рекьер къалурайдакай рикIел хкана.
М.Велиметова, Э.Мамедова Къурушар дуьзенлухриз куьч хьуникай М.Гьажиева кхьенвай “Им къван, имни терез” романдин метлебдикай чIехи классра кIелзавай аялриз суьгьбетна.
11-классда кIелзавай Адигуьзелова Садинади, Бабаева Аидади, Велиева Гуьлсенема, Гьуьсейнова Хадижади, Мирземетова Салегьади, Фаталиева Альбинади М.Гьажиеван “Им къван, имни терез” романдай чIукар таъсирдайвал кIелна.
Гьажи Къазиев
