Вичин ери-бине Кьурагь райондай тир Зарина Рагьмановадихъ журналистикадин рекье еке агалкьунар ава. Меркезда яшамиш жезвай бажарагълу лезги руш Госдумадин къвалав гвай жегьилрин парламентдин, ана кардик квай медениятдин рекьиз талукь пешекаррин советдин член я. Ада Госдумадин заседанийра иштиракзава, жегьилрихъ галаз кIвалах тухузва ва медениятдиз талукь месэлаяр веревирдзава. Идалайни гъейри, Зарина Москвадин гьукуматдин къвалав гвай информациядин сиясатдин комиссиядин член я. Ада чи йикъара чпихъ важиблувал авай месэлайриз талукь макъалаяр кхьизва, машгьур ксарихъ галаз интервьюяр кьиле тухузва. Жемиятдин хейлин тешкилатрин векил яз, ада активвилелди кIвалахрик вичин пай кутазва. Ам миллетрин арада алакъайриз талукь пешекарни я. Ада Госдумадин Комитетдин миллетрин крарихъ галаз алакъалу заседанийра мукьвал-мукьвал иштиракзава.
Вичин 23 йис ятIани, Зарина Рагьманова еке алакьунарни агалкьунар авай чешнелу пешекар, журналист, сиясатчи я. Ам Тюмендин областда дидедиз хьана. 18 йис тамам хьайила, уьлкведин меркездиз куьч хьана. Москвада ам РУДН-дин журналистикадин факультетдик экечIна. Студент чIавалай ам жемиятдин крарал машгъул жез гатIунна. Москвадин гьукуматда, федеральный телевиденийра ва газетра ада пешекарвилин тежриба кIватIна.
КIелунин, чирвилер къачунин рехъ ада исятдани давамарзава. Алай вахтунда ада Ломоносован тIварунихъ галай машгьур МГУ-дин госуправленидин факультетдин магистратурада кIелзава.
Гьеле мектебда кIелзамай чIавуз, бажарагълу жаванрин базадин член яз, Заринадиз ХМАО-дин губернатор Наталья Комаровади грамота ганай. Эхиримжи йисара адахъ вини дережадин конкурсра агалкьунар хьанва. Ам Вирироссиядин “Журналистика террордиз акси я” конкурсдин, Росмолодеждин медиа-грантрин ва журналиствилин хиляй хейлин маса конкурсрин гъалибчи я.
Агалкьунрин гурарай вини кукIушриз хкаж жезвай пешекар 2018-2019-йисара Росмолодеждин 1 миллион манатдин грантдиз лайихлу хьана. Адан бинедаллаз Зарина Рагьмановади журналистринни блогеррин клуб арадал гъана.
Лезги руша жуьреба-жуьре форумра, фестивалра мукьвал-мукьвал, гьа жергедай яз уьлкведин Президент В. Путинан иштираквал аваз, “Гьакъикъат ва адалат” лишандик кваз кьиле фейи конференциядани иштиракна.
Журналистика алай девирда хаталу пешедиз элкъвенва. Къейд ийиз кIанзава хьи, Вирироссиядин форум кьиле фейи вахтунда машгьур журналист Максим Шевченкодиз СИЗО-да азабрик кутур лезги гада Мурад Рагьимован гьакъиндай суал гайидалай кьулухъ Заринадизни къурху гайи делилни малум я.
Бажарагълу журналистди активвилелди Сад лагьай ва Россия 1 телеканалрин, гьа жергедай яз “Время покажет” передачадани теклифнавай мугьмандин еринда иштиракзава. Идалай вилик ада А.Малахова кьиле тухузвай “Пусть говорят” передачадани вичин фикирар малумарна.
Азад вахтунда ам спортдал, сиягьатдиз финал машгъул я. Эхиримжи вахтара сиясатдиз артух итиж ийизва. Гележегда адаз Госдумадин депутат хьунин ва халкьдиз куьмек гунин мурад, къаст ава. МГУ-дикни ам гьа и макьсад кьилиз акъудун патал экечIнава. Адет яз, гьа ихьтин ксариз лугьуда къастунал кIевибур, акьалтзавай несилриз чешне къалурзавайбур, халкьди чпел дамахдайбур…
Къуй чи бажарагълу рушан мурадар кьилиз акъатрай!
Куругъли Ферзалиев
