Шак физвайда хиве кьуна
Къизляр шегьердин полициядиз 22 йиса авай жегьил дишегьли вичин кIваляй къизилдин шейэр чуьнуьхнавайвилин гьакъиндай арза гваз атана. Полициядин къуллугъчийри тади серенжемар кьабулна ва шак физвайди кьуна, шегьердин полициядин отделдиз хкана.
Субут жедай делилар гъайила, полициядиз хкай 23 йиса авай дишегьлиди вичи, Б.-дин кIвализ гьахьна, анай 100 000 манатдин къимет авай къизилдин шейэр чуьнуьхайди хиве кьуна. Силисчийри шак физвайда маса тахсиркарвилерикни шериквал авунани авуначни ахтармишзава.
А касди авунвай тахсиркарвилин дережадиз килигна, РФ-дин УК-дин 158-статьядин 2-паюнин бинедаллаз чуьнуьхунар авунай уголовный дело къарагъарнава. Судди адаз 5 йисал къведалди кар гун мумкин я.
Пул чуьнуьхна
Тади гьалда гел жагъурдай серенжемар тухудайла, полициядин къуллугъчийриз Коркмаскъала хуьряй тир 17 йиса авай са жаванди пенсиядиз экъечIдай яшара авай са итимдин банкунин картадай, “Мобильный банк” ишлемишуналди, 8 агъзур манат пул чуьнухнавайди чир хьана.
Шак физвайди полициядиз хкайла ва тестикь жедай делилар гъайила, ада вичин тахсир хиве кьуна. Гьелбетда, винидихъ вичикай суьгьбет фейи дишегьлидилай хьиз, силисчийри и жавандилайни РФ-дин 158-статьядин 2-паюнин бинедаллаз угловный дело къарагъарнава ва тайин серенжемар кьабулзава…
Гьалал хьанач…
Полициядиз ЦIийи Тарки поселокдай тир 26 йиса авай дишегьли арза гваз атана. Ада рагъ алай йикъан нисинихъ малум тушир са касди вичивай 15 агъзур манатдин къимет авай сотовый телефон къакъудна, катна лугьузвай.
Полициядин къуллугъчийриз дежурствода авай са суткадин вахтунда кьабулай серенжемрин нетижада къачагъвал авунай шак физвай 47 йиса авай итим кьадай ва отделенидиз хкидай мумкинвал хьана. Ада вичин тахсир хиве кьуна ва телефон вахкана. Силисчийри а касди маса тахсиркарвилер авунани-авуначни ахтармишзава ва РФ-дин УК-дин 161-статьядин 1-паюнин бинедаллаз (къачагъвал) уголовный дело къарагъарнава.
Темягькарвал авурдаз гьалал хьанач. 15 агъзур манатдин къимет авай са телефон патал ам 4 йисуз азадвиликай магьрум хьун мумкин я.
Героин жагъана
Махачкъала шегьердин “Авангард” обществодай (дачадай) шак физваз кьуна хкай меркездин 48 йиса авай итимдивай полициядин къуллугъчийриз героин жагъана.
РФ-дин УК-дин 228-статьядин бинедаллаз (наркотикар законсуз маса къачунай, хуьнай, инай-аниз дашмишунай) уголовный дело къарагъарнава. Силис куьтягь хьайила, шак физвайди суддин вилик акъвазда.
Тади къачуна, вич телеф хьана
Аламатдин кIвалах я, рекьера гьерекат авунин къайдаяр чIуруникди гьикьван туькьуьл нетижаяр арадал къвезва. Эсер жезвач хьи, жезвач..!
ИкI, федеральный “Кавказ” шегьреда Къизилюрт райондин ЦIийи Чиркей хуьруьн патав 23 йиса авай са жегьилди вичи гьалзавай “ВАЗ-21114” маркадин автомашин къаршидиз къвезвай рекьиз акъудна. Нетижада адан автомашин рулдихъ 26 йиса авай итим галай “Тойота-Камри” — да акьуна. Еке хасаратвилер себеб яз “ВАЗ-21114” маркадин автомашиндин шофер гьа чкадал телеф хьана. Адан пассажирарни “Тойота Камри” автомашинда авай кас залан хирер хьанвайвиляй Къизилюрт райондин центральный больницадиз агакьарна.
Гьазурайди — Алаудин Гьамидов
