РД-дин хуьруьн майишатдин ва недай суьрсетдин министерстводин пресс-къуллугъди хабар гузвайвал, республикада зулун магьсулар цунин кIвалах активдаказ кьиле физва. Эхиримжи делилралди, техилдин тумар 65 агъзурни 361 гектардин майданда цанва. Им алатай йисан гьа и вахтунив гекъигайла, 7,7 агъзур гектардин гзаф я. РикIел хкин, санлай къачурла, алай йисуз зулун магьсулар 90 агъзур гектарда (2016-йисан кьадардив гекъигайла, 3 агъзур гектардин гзаф майданда) цун планламишнава.
Алай вахтунда техилдин тумар цунин кIвалах виридалайни гегьенш майданра Хасавюрт (12 агъзур га), Ногъай (7 агъзур гектардилай гзаф) ва Къизляр (5 агъзурни 800 гектар) районра кьиле физва.
РикIел хкин, зулун магьсулар ва хуьруьн майишатдин маса культураяр цунин кIвалах хуьруьн майишат патал виридалайни важиблу серенжемрик акатзава.
Чи мухбир
