Адет яз, гьикаятдин ва я шииратдин эсерар авай и ва маса ктаб кIелна куьтягьайдалай кьулухъ, кьацIал вичин чка кьуна, анал яргъалди фаракъат жеда. Амма зи вилик квайди адетдин ктаб туш, икрагьвал авачиз, гьар ашкъи ва мумкинвал хьайи береда кIелиз жедай, гьар сефердани са гьихьтин ятIани веревирдер ийиз тадай ва я нубатдин насигьат гудай чешме я.
Ихтилат дерин мана квай гафар (афоризмаяр) кхьинал машгъул устад Демир Беган (Демирбег Эмирбегов) Симферополь шегьерда цIийиз чапдай акъатнавай “Святилище для ошибок” ктабдикай я.
Афоризмайрин гьакъиндай ихьтин са фикир малум я: “Афоризмаяр туькIуьрун, адет яз, къелем гвай темпелбурун рикI алай кар я”. Амма Д.Эмирбегов кагьулвалзавай къелемчи туш. Адан анжах са ктабда агъзурдав агакьна маракьлу келимаяр гьатнава.
Хив райондин Хъукьварин хуьряй тир Демирбег Эмирбегов урус ва лезги чIаларал акъатнавай ругуд ктабдин автор я. Икьван чIавалди зун Демир Беган лезги чIалал акъуднавай “ФагьумайтIа…” ктабда гьатнавай келимайрихъ галазни таниш тир. Абурухъ инсан уяхардай, писни хъсан, дустни душман чириз куьмекдай, руьгь секинардай, инсандин пис къилихар негьдай, ахлакь хъсанардай къуват ава. ИкI тирди Махачкъалада кьиле фейи презентациядин мярекатда ктабдин гьакъиндай жуьреба-жуьре ксари авур ихтилатрини шагьидвална.
К. Къалажухви
Демир Бег
ФагьумайтIа…
- Чи куьгьне шадвилер анжах цIийи бахтсузвилери рикIелай алудда.
- Ахмакьвилер авун жегьилвилиз хас я, кьуьзуьвал абур кхьидай тарихчи я.
- ЧIижре хьиз кIвалахдайла, ял ядай са декьикьа, вирт хьиз, ширин жеда.
- Чувуд, пул тахьайла, дили жеда, лезги — пул хьайила.
- Гьар са кьве чин алайдаз вичин метIер акъатнавай шалвар авайди я, — герек атайла, алукIдай.
- Ахмакьри авур гъалатIрикай камаллуйри тарс хкудда.
- ГъалатIар ахъаюн айиб туш, гъалатIар тикрарун айиб я.
- Буржар кьаз чидайдаз абур вахкун тийидай къайдаярни чир жеда.
- Жув мугьманвиляй хутахдайла, улакь жуван кIвачер хьайитIа хъсан я.
- Гъуьлягъ хьиз галчIур жедайда гьар юкъуз хамни дегишарда.
- Яру ктабда инсанни гьатнавалда… Намус кумай инсан.
- Такабурлувал гьализ жедай балкIан туш, ада вири вегьеда.
- Жуван алакьунривай тарсар къачун тавурди са дережадивни агакьдач.
- Бажарагълудан алакьунрикай дустар тергдай яракь жеда.
- Са карни тийизвайда гъалатIриз ерли рехъ гудач.
