Дагъустан Республикадин Кьилин везифаяр вахтуналди тамамарзавай Владимир Васильева сад лагьай сефер яз агьалияр кьабулна.
Хив райондин КьуштIилрин хуьряй тир Тимур Агъабаева чпин хуьре эцигиз гъиле кьур спортзалдин дарамат куьтягьунин патахъай тIалабна. Владимир Васильева гуьруьшда иштиракзавай РД-дин экономикадин ва территорияр вилик тухунин министрдин везифаяр вахтуналди тамамарзавай Раюдин Юсуфовал и месэла гьялун тапшурмишна ва алава хъувуна: “Республикадин 2018-йисан бюджетдик и эцигунар тамамвилелди куьтягьун патал герек кьадар такьатар кухтуна кIанда. И месэла гьялуниз талукь хабар зал ахгакьара”.
Абдула Мукаилова Агъа Жангутай-Доргели рекье муьгъ эцигунин месэла кудна. Виликан муьгъ 2016-йисан июндиз селлери тухванай.
Республикадин Кьили “Дагавтодордин” регьбер Загид Хучбароваз муьгъ эцигун 2018-йисуз республикадин рекьерин майишатдиз государстводин гьисабдай куьмек гунин программадик кутун буйругъна. “Эгер муьгъ эциг тавуртIа, чакай са вуж ятIани къуллугъ авачиз амукьда”, — лагьана В.Васильева.
Махачкъалави Дадав Умарова Азиз Алиеван куьчеда законсуздаказ гзаф мертебайрин кIвалер эцигзавайдакай малумарна. Шегьердин мэр Муса Мусаева месэладин гъавурда турвал, республикадин эцигунрин ва архитектурадин министерстводи кIвалер эцигун патал кьабулнавай къарар къуватдай вегьена.
И месэладин патахъайни В.Васильева лагьана: “За виликамаз хабардарзава, я куьне и месэлада къайда твада, я за кадрийриз талукь серенжемар кьабулда. Чна агьалийрин ихтиярар хуьда ва и кар патал чалай алакьдай вири чараярни аквада”.
Меркезда яшамиш жезвай Зульфия Рабадановади Ирчи Казакан куьчеда авай чпин кIвалерин къавар ремонт авунин месэла гьялун тIалабна. Шегьердин администрациядин кьил Муса Мусаева малумарайвал, са вацран вахтунда къавар ремонтна куьтягьда.
Гуьруьшда агьалийри винел акъудай вири месэлайрин гьакъиндай В.Васильева талукь ведомствойрин чIехибуруз тапшуругъар гана.
«Лезги газет»
