Аскервилин кьинез кIевелай вафалу яз интернациональный буржи кьилиз акъуддайла, Афгъанистанда викIегьвал къалурайбурукай сад чи ватанэгьли Абас Исрафилов тир. Адаз Советрин Союздин Игитвилин тIвар гана. Игитдин тIвар вири уьлкведа машгьур хьанва.
Сулейман-Стальский райондин Курхуьруьн 2-нумрадин юкьван мектебдин пионеррин организациядални Абас Исрафилован тIвар ала. И тIварцIиз аялри гьуьрметзава. И кар абуру гьар жуьредин хъсан мярекатар тухуналди, хъсандиз кIелуналди, хийирлу кIвалахар авуналди къалурзава.
Ингье и йикъара, Игит Абас Исрафилов рикIел хкунин лишан яз, мектебда шад мярекат кьиле тухвана. Адаз районда кардик квай афгъанвийрин союздин председатель Ризаев Ислеманазни теклифнавай. Вичин рахунра ада Афгъанистандиз чи армия ракъурунин себебрикай, дяведа чи аскерри, гьа жергедай яз дагъустанвийрини лап четин шартIара, женгера иштиракайдакай, разведкада, сенгеррал къалурай викIегьвилерикай суьгьбетна. Абас Исрафилован игитвилерикай рикIел хкана, аялриз адалай чешне къачуниз эвер гана.
Гуьгъуьнлай Абас Исрафилов рикIел хкунин ихтилатар мектебдин директор Гьажалиев Руслана, тешкилатчи Шихбабаев Гьуьсена, старший пионервожатый Саругъланова Гьуьруьхалума авуна, абуру чпин вилик исятда квай кIвалахрикайни лагьана. Кьилди къачуртIа, акьалтзавай несилдиз ватанпересвилин тербия гун мадни гужлу, жанлу авун патал районда кардик кутунвай махсус программадин сергьятра аваз аялриз тербия гунин важиблу кIвалах авайдалай хейлин хъсанарнавайди, герек стендар, альбомар гьазурнавайди, абурукай менфят къачузвайди, тербиядин сятер, суьгьбетар тухузвайдини лагьана. Гуьруьш кьиле фидай чIавуз дуствиликай, викIегьвиликай, Афгъанистанда женгера хьайи аскерриз, Абасаз вичиз талукьарнавай манияр лагьана, шиирар кIелна. Мярекатдин эхирдай Ислеман Ризаева афгъанвийрин союздин тIварунихъай мектебдин дружинадиз “Солдаты отечества” тIвар алай ктаб багъишна.
Райсудин Набиев
