Мегьарамдхуьруьн райондин образованидин идарайра Россияда 2014-йисалай къейдзавай, уьлкведин мулкунал ва я маса чкайра телеф хьайи Советрин уьлкведин, Россиядин аскерар рикIел хкуниз талукь Йикъан мярекатар кьиле фена.
Москвадин патав немсерин кьушунар дарбадагъ авурдалай инихъ 25 йис алатунихъ галаз алакъалу яз, 1966-йисан 3-декабрдиз, малум тушир аскердин кIарабар Ленинград шегьердин 41-километрда авай стхавилин сурай акъуднай ва Александровский багъда, Москвадин Кремлдин цлан патав кучукнай.
Мегьарамдхуьруьн райондин школайра классдин сятер, къагьриманвилин ва библиотекайрин тарсар кьиле тухвана, Гъалибвал патал женгера телеф хьайи аскеррикай рахана.
Мярекатрин сергьятра аваз Ватан патал чанар гайи, эхиримжи нефесдалди яракь гъиляй вегьин тавур, тIварар чириз тахьай игитар рикIел хкана.
Телеф хьайи аскеррин къаматар рикIел хуьн яз, мектебра кIелзавай аялри шиирар кIелна, манияр яна, мусибатдин дяведин йикъарин гьакъикъат ачухарзавай гъвечIи сегьнеяр къалурна. Мярекатрин иштиракчийри малум тушир аскерриз памятникар эцигнавай чкайриз экскурсиярни тешкилна. Ватандин азадвал патал чанар гайи аскерар, са декьикьада кисна акъвазуналди, рикIел хкана.
Ватан хвейи гьар са аскер рикIел хуьн вири агьалийрин пак буржи я. Малум тушир аскердин югъ — им стхавилин сурара кучукнавай вири игитриз чухсагъул лугьудай югъ я. Ихьтин мярекатри акьалтзавай несилдин ватанпересвилин къанажагъ мягькемариз куьмек гузва.
«Лезги газет»
