И йикъара Владимирский областдин Суздаль шегьерда ВИЧ азардин вилик пад кьунин месэлайриз талукьарнавай Вирироссиядин совещание кьиле фена. Ана С.М.Мегьамедован тIварунихъ галай республикадин садакай масадак акатдай азаррин ва СПИД-дин вилик пад кьадай, адахъ галаз женг чIугвадай центрадин (РЦИБ и СПИД) пешекаррини — Аида Салаватовади, Жамал Ризванова ва Раисат Къадиевади иштиракна.
Совещанидал кьилин докладар авур ксарин арада авай: РагъэкъечIдай патан Европада ва Центральный Азияда ВИЧ/СПИД-дихъ галаз женг чIугунай ООН-дин сад тир программадин (ЮНЭЙДС) тереф хуьдай региональный дестедин директор Виней Салдана, ВИЧ-дин вилик пад кьадай ва адахъ галаз женг чIугвадай илимдинни методикадин федеральный центрадин кьил Вадим Покровский, РФ-дин здравоохраненидин ВИЧ азардин месэлайрай кьилин пешекар, профессор Евгений Воронин ва масабур.
ВИЧ-дин вилик пад кьуниз ва адахъ галаз женг чIугуниз, гьакIни садакай масадак акатдай гепатит азардиз талукь месэлаярни тамам 3 юкъуз веревирдна.
РикIел хкин: ВИЧ/СПИД азардин вилик пад кьадай ва адахъ галаз женг чIугвадай къуллугъ арадал атана 30 йис тамам хьанва. Алатнавай йисара адалай чIуру и азардин вилик пад кьуниз, диагностикадиз ва сагъаруниз талукь еке месэлаяр гьялиз алакьна. Гьайиф хьи, ВИЧ-дикай, СПИД-дикай сагъардай дарман авач, амма азарлу хьайибурун уьмуьр ерилу ва яргъи ийиз жезва. Гьаниз килигна азар вахтунда дуьздал акъудунихъ еке важиблувал ава. Садакай масадак фад акатуниз, вичин хаталувилиз, дуьньядин хейлин чкайра чукIуниз килигна, ВИЧ/СПИД тарихда XX асирдин тIегъуьн яз гьатна.
Регина Семедова
