Сулейман-Стальский райондин 90 йис тамам хьунихъ галаз алакъалу яз образованидин хиле лайихлувилерай ва яргъал йисарин намуслу зегьметдай Россиядин Игит Радим Халикьован тIварунихъ галай Кьулан СтIалрин юкьван школадин физкультурадин муаллим  Керим  Бабаеваз  “Да­­гъус­тан Республикадин лайихлу муаллим” лагьай гьуьрметдин тIвар га­на. Наградани адав Да­гъустан Рес­публи­ка­дин Гьукуматдин Председатель Артем Здунова ва адан заместитель Рамазан Жафарова вахкана (шикилда), тебрикдин келимаяр ва кIва­лахда мадни еке агалкьунар хьана кIанза­вайди лагьана.

…Пешеяр гзаф ава. Гьи пе­ше хъсанди я, гьидакай обществодиз гзаф хийир ава? Са га­фу­налди жаваб гуз хьун мумкин туш.

Обществодиз гзаф хийирлубурукай яз муаллимвилин пешедин тIвар кьуртIа, зун бажагьат ягъал­миш­ жеда. XIX асирда яшамиш хьайи Италиядин писатель Джованни Руффиниди лагьанай: “Муаллим, вич куз, масадаз ишигъ гузвай шем я”.

Вичикай ихтилат физвай Керим Къадировичани муаллимвилин пе­ше хкягъунал, и рекье яргъал йиса­ра­ кIвалахдай мумкинвал хьунал дамахзава. Ада 1970-йисуз хуьруьн юкь­ван школа, гуьгъуьнлай Махачкъалада физкультурадин муаллимар гьазурдай курсар акьалтIарна, кьве йисуз ДаркIуш-Къазмайрин юкьван школада физкультурадин тарсар гана.

1974-йисалай инихъ К.Бабаева Кьулан СтIалрин юкьван школада вичин рикI алай пешедай кIва­лахун давамарзава. 1981-йисуз ада Че­чено-Ингушетиядин госуниверситетни акьалтIарна.

Акьалтзавай несилдиз физический культурадин рекьяй чирвилер гу­нихъ, кьилдин кIелзавайбур ва шко­ладин командаяр районда тухузвай школьникрин спартакиадайриз, жуьреба-жуьре турнирриз гьазурунихъ галаз санал К.Бабаева школадин общественный уьмуьр­дани активвилелди иштиракиз хьана. ИкI, саки 10 йисуз ада шко­­­лада кардик кутур ученикрин производственный бригададиз регьбервал гана. И бригада неинки районда, гьакI республи­кадани кIвен­­кIвечийрин жергеда авай.

Керим Къадировича гьазурай командайри са шумуд йисуз райондин школьникрин спартакиадайра ва  маса турнирра кьезил атлетикадай, мини-футболдай 1-чкаяр кьуна. Идалайни гъейри, адан  регьбервилик кваз Избербашда, Каспийскда, Махачкъалада кьиле фе­йи “Спартакиада допризывной молодежи”, “Орленок”, “Президент­ские соревнования” акъажунра иш­тиракай командайри ва кьилдин спортсменри 1-3-приздин чкаяр кьуна.

Эхиримжи йисара республикадин школьникрин арада (яшарин пуд дестеда) тухузвай акъажунрани Керим Къадировичан тербиячийри алакьунар къалурзава. Дагъустан­­­ Республикадин кIвенкIвечивал патал тухвай акъажунра чи командайри волейболдай 2-чка, многоборьедайни стритболдай 3-чкаяр кьуна.

К.Бабаеван гъилик вердишвилер къачур кьилдин гадайрихъни рушарихъ райондин ва республикадин турниррани акъажунра мадни хъсан нетижаяр жезва.

— Районда физический культурадин рекьяй виридалайни хъсан муаллим тир Керим Къадировича чи школада кIвалахунал чна гьахълудаказ дамахзава, — лугьузва школадин директор Ифриз Бабаевади. — Ам вичин кIвалахдив рикI гваз эгечI­зава. Гьавиляй ада гьазурзавай школьникрин командайрихъ ва кьилдин спортсменрихъ неинки районда, гьакI республикадани хъсан нетижаяр жезва. Са шумуд йис я чи школадин командади райондин школьникрин спартакиадайра гъалибвал къачуз. Гаф авач, пешедин устад я Керим муаллим.

Гьа са вахтунда К. Бабаева вичини, яшариз ва асул кIва­лах­диз серфзавай вахтунизни килиг тавуна, спортдин акъажунрани иштиракзава. ИкI, ам 2017-йисуз Махачкъалада ГТО-дин нормаяр вахкунай тухвай Да­гъустан Республикадин чем­пио­натда вичин яшарин спортсменрин арада гъалиб хьана. Идалайни гъейри, Керим муаллимди республикадин ва зональный акъажунра судьявилин везифаярни тамамарзава.

К.Бабаеван яргъал йисарин намуслу зегьмет, Дагъустан Республикадин лайихлу муаллим тIвар­цIелай гъейри, РСФСР-дин прос­ве­щенидин отличник (1986-йис), “РФ-дин умуми образованидин гьуьр­метлу работник” (2010-йис) тIва­рар, “Зегьметдин ветеран” медаль (2001-йис), РФ-дин Президентдин Грант (2009-йис), РД-дин образованидин ва илимдин министерстводин, райондин образованидин управленидин, школадин дирекциядин патай гзаф кьадар гьуьрметдин грамотаяр гуналди къейднава.

* * *

КIвалахдал, аялрал гзаф рикI алай Керим Бабаеваз чIехи ва гьуьр­­метлу хизандини руьгьдин таъ­мин­вал гузва. ИкI, адан уьмуьр­дин юлдаш Имара Абдулбариевна 45 йисуз биологиядин тарсар гузвай­ муаллим, РФ-дин умуми образованидин гьуьрметлу работник я. Абурун веледар тир Миленади Ви­ни СтIал­рин юкьван школада урус чIа­ланни литературадин муаллимвиле, Лейлади райбольницадин поликлиникада акушервиле, Дианади ЦРБ-да бух­галтервиле кIвалах­за­ва­.

Дагъустан Республикадин ла­йих­лу муаллим лагьай тIвар мубарак авуналди, чаз Керим Къадировичахъ кIвалахда мадни еке агалкьунар хьана кIанзава.

Хазран Кьасумов