14 ва 15-декабрдиз Мегьарамдхуьруьн райондин кьил Ф.Агьмедован призар патал 2004-2005-йисара дидедиз хьайи жаванрин арада дзюдодай Дагъустандин кIвенкIвечивилин акъажунар кьиле фена.
ИкI, 14-декабрдиз Советрин Союздин Игит Абас Исрафилован тIварунихъ галай ДЮСШ-да юбилейдин X акъажунар ачухуниз талукьарнавай шад мярекатдал райондин кьил Фарид Агьмедова, администрациядин жавабдар къуллугъчийри, багьа мугьманри, гьа гьисабдай яз СССР-дин спортдин мастер, Дагъустанда дзюдодай федерация арадал гъайи Тажир Абдулатифова, ветеранрин арада самбодай дуьньядин чемпион Юрий Исмаилова ва масабуруни иштиракна. Спортсменринни мугьманрин, акъажунрин тамашачийрин тIварцIихъ чими келимаяр лугьунихъ галаз сад хьиз, Ф.Агьмедова спортдин серенжемдин макьсаддикай, районда спорт вилик тухун патал кьилиз акъудзавай крарикай куьрелди лагьана, акьалтзавай несил сагъламди хьунин мураддалди и хиле кIвалах гележегдани давамардайдахъ инанмишарна. Райондин кьили жегьилар — чи гележег — ватанпересвилин руьгьдаллаз тербияламишунин важиблувални къейдна. Гьаниз килигна и жуьредин серенжемра Кьиблепатан Дагъустандин десантникрин Союздин ветеранри-десантникрини иштиракзава. Им дуьшуьшдин кар туш, гьикI хьи, Ф.Агьмедова вичини ВДВ-да къуллугъна.
Шад мярекатдал райондин кьили са жерге спортсменрив ва тренеррив МР-дин гьуьрметдин грамотаярни вахкана. Т.Абдулатифова РД-дин дзюдодин федерацияди республикада дзюдо вилик тухунай чухсагъул малумарнавай чар Ф.Агьмедовавни вахкана. Ю.Исмаилова райондин кьилиз Дагъустандин машгьур художникдин “Ярагъ Мегьамед” суьрет багъишна.
Тамам кьве юкъуз 200 спортсмендин арада кьиле фейи къизгъин бягьсерин нетижада Дагъустанда виридалайни викIегьбур хкяна.
Регина Семедова
