И йикъара Дагъустан Республикадин Кьил Владимир Васильеван кар алай “Зи Дагъустан” проект уьмуьрдиз кечирмишунал гуьзчивалзавай жемятдин векилрикай ибарат ва кьиле проектдин координатор Рукъият Агьмедова авай десте Ахцегь райондиз кIвалахдин рекьяй мугьман хьана, хабар гузва райадминистрациядин пресс-къуллугъди.
РикIел хкин, проект 2019-йисуз гъиле кьуна, йисан эхирдалди 400 объект ишлемишиз вахкун пландик кутунва. Абурун арада целди таъминарунин объектар, рекьер, паркарин чкаяр, гзаф мертебайрикай ибарат яшайишдин кIвалерин гьаятра авай майданар ава.
ИкI, Ахцегьа, “Зи Дагъустан — шегьердин къулай шартIар” проектдин сергьятра аваз, “Ахты-чай” вацIун къерехда авай “Набережный” парк аваданламишзава (и кIвалахрин къимет 17 миллионни 612 агъзур манатдиз барабар я) ва Мукьтадир Айдинбегован тIварунихъ галай сквер цIийикIа туькIуьр хъийизва (чкадин бюджетдай чара ийизвай пулни кваз 2 миллионни 971 агъзур манат). “Зи Дагъустан — зи рекьер” проектдин сергьятра аваз ремонтдин кIвалахар хуьруьн къенепатан рекьерани тамамарнава: Ленинан куьчеда — 0,5 км, Гьажи Ахцегьвидин — 1,1 км ва Арсен Байрамован куьчедин 0,3 километрдин мензилда, и кIвалахриз санлай 1 572 167,29 манат харжнава.
Рукъият Агьмедовади муниципалитетдин кьил Осман Абдулкеримовахъ, райондин депутатрин собранидин председателдихъ ва жемиятдин гуьзчивилин активдихъ галаз санал объектрал кIвалахар кьиле физвай гьал ахтармишна.
Абдулжелилован куьчеда авай “Набережный” парк аваданламишунин кIвалахар ахтармишуналди, Рукъият Агьмедовади объект гьам майдандал, гьамни алай чкадал гьалтайла, вичиз тешпигь авачир хьтинди тирди къейдна.
Дугъриданни, 10 агъзур квадратный метрдилай виниз майдан авай паркунин мулкунал алаз, вацIун, Ахцегьрин къеледин, жуьмя мискIиндин, хуьруьн куьгьне магьлейрин, ротондадин ва муькъуьн шикилар ачух жезва. Объект ишлемишиз 20-декабрдиз вахкудайвал я.
«Лезги газет»
