И мукьвара Сулейман-Стальский райондин кьил Нариман Абдулмуталибов Эминхуьруьн агьалийрихъ галаз гуьруьшмиш хьана ва хуьруьн месэлаяр веревирдна.
Меценат Шагьпаз Асаханова Нариман Абдулмуталибоваз Эминхуьре мергьяматлувилин фонд тешкилунин гьакъиндай малумат гана. Аниз агакьзавай такьатар хуьруьнвийрин хци месэлаяр гьялун патал харжда.
Мергьяматлувилин фонд Тюменский областдин Сургут шегьерда яшамиш жезвай эминхуьруьнвийрин меслятдалди тешкилнавайди я. И дестедин кьиле Низами Жигеров ава. Гуьгьуьллувилелди хуьруьн агьалийри гузвай такьатрин гьисабдай гьеле 300 агъзур манат кIватIнава. И такьатар активистри кьурай тарар атIун, рекьер туькIуьрун, цин гьавизар михьи авун патал ишлемишна.
Эхиримжи йисара райондин бюджетдин гьисабдай Эминхуьре кьве куьчеда къир цана. 2018-йисуз 440 ученикдин чкаяр авай цIийи школа ишлемишиз вахкана.
2020-йисуз “Шегьердин къулай шартIар” программадай Эминхуьре аялрин майдан галай парк-сквер туькIуьрда, 2021-йисуз “Хуьруьн мулкар комплекснидаказ вилик тухун” госпрограммадай спортдин комплекс эцигда.
Гуьруьшмиш хьунин нетижаяр кьуналди, райондин кьили къейдна: “Алай вахтунда жуьреба-жуьре проектар ва программаяр уьмуьрдиз кечирмишуник агьалияр чебни экечIун чарасуз я. Исятда маса къайда хьанва, проектар бюджетдинбур тушир чешмейрайни финансламишна кIанзава. Квехъ хъсандиз эгечIун, мергьяматлувилин фонд ава. За хуьруьн мергьяматлувилин фонд арадал гъун патал кьил кутурбуруз сагърай лугьузва. Умудлу я хьи, виридан къуватралди чавай яваш-явашдиз Эминхуьруьн вири месэлаяр гьялиз алакьда”.
