Театррин йисуз Лезги театрда нубатдин сезон неинки цIийи тамаша къалурунилай ва гастролрилай, гьакIни кадрийрин барадай дегишвилер кьиле тухунилай башламиш хьана. ИкI, бажарагълу актер, театрда тамашаяр эцигзавай режиссер Казбек Думаев кьилин режиссёрдин къуллугъдал тайинарнава. Идан гьакъиндай чи газетдиз Лезги театрдин пресс-къуллугъди хабар гана.
“Казбек Думаев и къуллугъдал тайинарунин къарар сад лагьайди, театрдин артистар ва амай къуллугъчияр дуьзгуьндаказ кар-кеспидик кутун таъминарунин макьсаддалди кьабулнавайди я. Кьвед лагьайди, ада театрдин вири къуллугъчийрин къуватар агудун, абуру яратмишунрин кIвалахдин дережа мадни хкажунин рекье аваз тухун лазим я. За умуд кутазвайвал, цIийи кьилин режиссёрдилай коллектив тупламишиз, яратмишунрин барадай вилик эцигдай чIехи везифаяр кьилиз акъудунал желб ийиз, гележегда чIехи агалкьунар къазанмишиз алакьда”, — лагьана, К.Думаев кьилин режиссёрдин къуллугъдал тайинаруниз баян гуналди, театрдин директор Динара Эминовади.
Казбек Саидинович Думаеван 32 йис я. Ада 2009-йисуз Дагъустандин государстводин университетдин “актервилин искусство” факультет акьалтIарна. 2017-йисуз театрдин режиссервиле тайинарайдалай гуьгъуьниз Казбек Думаева Москвада А.Райкинан тIварунихъ галай сегьнедин искусстводин Кьилин школада театрдин режиссурадин рекьяй пешекарвал хкажна.
2008-йисуз адакай дуьньядин театральный вузрин бажарагълу студентрин арада “Ваз ачух жезвай мумкинвал” (“Твой шанс”) лишандик кваз Москвада кьиле тухвай фестивалдин премиядин лауреат хьана.
К.Думаева Дербент шегьерда, гьакIни республикадин дережада кьиле тухузвай вири фестивалра, режиссервилихъ галаз алакъалу мярекатра мукьвал-мукьвал иштиракзава.
Эминат Загьирбегова
