9-декабрдиз Къумукьрин театрдин залда РД-дин Гьукуматди “Дагъустандин руьгь” (“Душа Дагестана”) тIвар алаз тайинарнавай, республикадин халкьдин яратмишунар ва адетдин культура хуьник ва вилик тухуник еке пай кутунай гузвай премиядин лауреатрив и шабагь вахкуниз талукьарнавай мярекат кьиле фена ва лауреатрин иштираквал аваз чIехи концерт гана.
Ам РД-дин культурадин министерстводи, Республикадин халкьдин яратмишунрин кIвали тешкилнавайди тир.
РД-дин Гьукуматдин “Дагъустандин руьгь” премия 2012-йисалай инихъ гузва. ЦIи и премия къачун патал 3 шегьердай ва 48 райондай 51 арза атанвай.
Шадвилелди къейд ийин хьи, Гьукуматдин премиядин лауреатрин арада РД-дин лайихлу артистка, Ахцегь райондин ашукьрин “Шарвили” тIвар алай коллективдин солистка Рубаба Къурбановани ава.
Чна Рубабадиз и еке агалкьун мубаракзава, гележегда мадни виниз тир дережайрив агакьун алхишзава.
«Лезги газет»
