Дагъустандин Кьил Владимир Васильева гьисабзавайвал, хуьрерин мектебар пешекар кадрийралди таъминарун Дагъустандин образованидин хилен вилик акъвазнавай эвелимжи нубатдин везифайрин жергедик акатзава.
В.Васильева СКФО-да РФ-дин Президентдин патай тамам ихтиярар ганвай Векил Александр Матовниковахъ, гьакIни округдин регионрин руководителрихъ, Махачкъалада СМИ-рин векилрихъ галаз кьиле фейи гуьруьшда иштиракна.
Округдин регионра илимдинни чирвилер гудай центраяр тешкилуниз талукь яз журналистди гайи суалдиз жаваб яз, Дагъустандин руководителди къейд авурвал, педагогар хуьрерин мектебриз кIвалахиз фин патал ашкъиламишдай шартIар яратмишун республикадин вилик акъвазнавай эвелимжи нубатдин везифайрикай сад я.
“За чирвилер гудай центраяр ачухун дуьз кар яз гьисабзава. Абур гьакъикъатдани герекзава. Амма Дагъустанда тайин тир предметрай тарсар гудай муаллимар бес тахьунин месэла иллаки дагълух районра хцидаказ вилик акъвазнава. Алай йисуз пешекарар бес тежезвай хуьрерин чкайриз кIвалахал фин къарардиз къачудай муаллимар ашкъиламишун патал республикада сифте яз 50 миллион манатдин такьатар чара авуна”, — В.Васильеван и гафар Дагъустандин Кьилин ва гьукуматдин пресс-къуллугъди раижнава.
В.Васильева къейд авурвал, Дагъустанда мектебра, абур бинеламиш хьанвай чкадилай аслу тушиз, ерилу чирвилер къачун патал дуьзгуьн шартIар яратмишун герек я.
“Къведай йисалай чина “хуьруьн муаллим” программа къуватда гьатда. Гьелбетда, кIвенкIвечи центраяр герек я. Гьа са вахтунда хуьруьн мектебра кIелзавай аялдиз чирвилерин барадай маса мектебра кIелзавай аялрихъ галаз акъажунриз экъечIдай сад хьтин мумкинвилер ачухдай дуьзгуьн шартIарни аваз хьун лазим тирди аннамишун герек я”, — баян гана республикадин Кьили.
«Лезги газет»
