И мукьвара  Хасавюрт райондин Къурушрин хуьре жемят патал ял ядай, бицIекриз къугъунардай цIийи парк ачухунин шад мярекат кьиле фена.

Мугьманар хуьруьн администрациядин кьил Рафик Юсупова, къурушвийрин адет тирвал, тIанурдин фалдини нисидалди, самовардин атирлу чайдалдини хуш манийралди къаршиламишна. Абурун арада Хасавюрт район­дин­ кьилин заместителар тир Мама­ев Багьаут­дин, Касимов Вагьит, райсобранидин председатель Лабазанов Лабазан ва маса векилар авай.

Л.Лабазанова и шадвилин вакъиа райондин кьилин ва вичин патай тебрикна.

Къурушрин хуьр неинки райондани республикада, гьакI виликан СССР-дин вири республикайрани агалкьунралди машгьур хьайи­ди я. Алай вахтунда “Шегьердин къулай шар­тIар тешкилун” проектдин сергьятра аваз республикадин са жерге шегьеррани хуьрера­ мулкар абадунин кIвалахар кьиле тухузва­. Абурун жергедай яз — Къурушдални­.

Къурушрин хуьруьн агъсакъалрин Советдин председатель Вердихан Вердиханова къейдна:

— Гьуьрметлу Хасавюрт райондин ад­министрациядин векилар, хуьруьн жемят. Эхиримжи вахтара­ къурушвийрин яшайишдин шартIар хъсанвилихъ элкъвезвайди ашкара я, — хуьруьз Сулак вацIун яд гъуни, ина пожарный часть ачухуни, школайра чими­вал гудай системаяр цIийи хъувуни, хуьре кьве чка­дал агьалийриз ял ядай шартIар яратмишуни,  гьакIни гуьрчег парк ачухуни а кардин гьакъиндай ша­гьидвал­зава. Зегьмет чIугур виридаз за сагърай лу­гьузва. ТIалабзава и гуьрчег чкада михьивал хуьн. Им вири чи жемят, хуьр авадан хьун патал я.

Мадни анал рахай Юсупов Рафика, х­уьруьн культурадин дараматдин директор Къурбанов Захара ва маса юлдашри хуьре хьанвай дегишвилерикай, ял ягъун патал туь­кIуьр­навай гуьрчег паркуникай ва абур   михьидаказ  хуьникай  ла­гьана.

Парк ачухун патал яру лент атIун Лабазанов Лабазанал, Мамаев Багьаутдинал ва Юсупов Рафикал ихтибарна. Ахпа инал кIватI хьанвай жемят, райондин векилар, аялар, диде-бубаяр паркуниз гьахьна, ана яратмишнавай къулайвилерихъ, аялар патал туь­кIуьрнавай чкайрихъ галаз таниш хьана, ­шикилар яна. Шадвилер яргъалди давам ­хьана.

Гьажи  Къазиев