Ахцегь район чпин агалкьунралди республикадилай къецепатани машгьур авур спортсменрин жергедай яз, Расул Султановни къалуриз жеда. Гьеле 12 йисан яшда аваз ада дзюдодай вердишвилер къачуз эгечIнай. 1995-йисуз Бакуда физический культурадин ва спортдин Академиядин единоборствойрин факультет куьтягьайдалай кьулухъ Расула жуьреба-жуьре акъажунра агалкьунралди иштиракна. Ингье абурукай са шумуд.
1996-йисуз Анкара шегьерда (Туьркия) дзюдодай кьиле фейи международный турнирда 2-чка, 1997-йисуз Конья шегьерда (Туьркия) международный турнирда 3-чка кьуна. Гьа и йисуз Азербайжандин жегьилрин арада акъажунра 1-чка кьуналди, ам чемпионвилин тIварцIиз лайихлу хьана.
Дзюдодай къазанмишзавай агалкьунриз килигна, Расул Султанов 1998-йисуз Азербайжандин спортдин мастервилин тIварцIиз лайихлу хьана. Гуьгъуьнин йисара пешекар дзюдоистрин арада кьиле физвай акъажунра мадни еке агалкьунар къазанмишна.
2010-йисуз Будапештда (Венгрия) 100 кг-дин заланвал авайбурун, 30-34 йис яш хьанвай спортдин мастеррин арада дзюдодай кьиле фейи дуьньядин чемпионатда ва Поречь шегьерда (Хорватия) Европадин чемпионатда Р.Султанов буьруьнждин медалриз лайихлу хьана.
2011-йисан 30-августдиз Нью-Йоркда (США) дзюдодай кьиле фейи дуьньядин чемпионатдани чи ватанэгьлиди 3-чка кьуна. Гуьгъуьнин йисуз Майами шегьерда (США) 30-35 йисарин яшда авай мастеррин арада кьиле фейи дуьньядин чемпионатда ам 100 килограммдин заланвал авайбурун арада гимишдин медалдиз лайихлу хьана. 2013-йисуз Абу-Дабида (Арабрин Саднавай Эмиратар) 35-39 йисарин яшда авай мастеррин арада кьиле тухвай дуьньядин чемпионатда Р.Султанов 100 кг-дин заланвал авайбурун арада 1-чкадиз, къизилдин медалдиз лайихлу хьана. 2014-йисуз гьа и заланвилин категориядай ва яшарай спортдин мастеррин арада Малага шегьерда (Испания) кьиле тухвай дуьньядин чемпионатдани ада 3-чка кьуна.
Гуьгъуьнлай, бедендиз хасаратвал хьун себеб яз, Расул Султановавай спортдин акъажунра иштирак хъийиз хьанач.
Алай вахтунда ада Азербайжанда чпихъ хъсан гележег авай спортсменар вердишарзава. Чаз машгьур спортсмендихъ и рекьяйни виниз тир нетижаяр хьана кIанзава. Чна, районэгьлийри, Расул Султанова спортда къазанмишнавай агалкьунрал дамахзава.
Нариман МАМЕДОВ
