Жуван миллетрин векилрин агалкьунрикай ван хьайила, дамахни шадвал тийидай ксар, зи фикирдалди, авач. Республикадилай къеце абуру чпин къени къилихралди, хъсан кIелунралди, спортдин майданра гьунарар къалуруналди … чи ватандин — Дагъларин уьлкведин — тIвар машгьурзава. Ингье и йикъара Москвадин госуниверситетда (МГУ) чи ватандаш руша — Аида Агъахановади кIелзавайди, ам аниз экзаменар авачиз кьабулнавайди чир хьайила, заз гзаф шад хьана. Адахъ галаз чи газет кIелзавайбурни танишариз кIанзава.
Аида Агъаханова 1996-йисуз Махачкъалада дидедиз хьана. 2014-йисуз Мегьарамдхуьруьн райондин Самурда 1-нумрадин юкьван школа акьалтIарна, ам Даггоспедуниверситетдиз математикадин, физикадин ва информатикадин (экономика ва информатика хел) факультетдиз гьахьна. Алай йисан мартдиз Махачкъалада Дагъустандин госуниверситетда вузра кIелзавай студентрин арада ингилис чIалай кьиле фейи олимпиадада (вири санлай ина 40-дав агакьна рушарини гадайри чпин чирвилер ахтармишна) А.Агъаханова “American league” номинациядай 1-чкадиз лайихлу хьана. Гуьгъуьнин вацра (26-апрелдиз) ада ингилис чIалай Владикавказ шегьерда Кеферпатан Кавказдин вузра кIелзавай студентрин (120-далай виниз) иштираквал аваз кьиле фейи II турда вичин чирвилер ахтармишна. “Englishprofessional” номинациядай ада 1-чка кьуна. Имни олимпиададин эхиримжи турда иштиракун патал рехъ ачух я лагьай чIал тир.
27-июнь. Москва шегьер. И юкъуз МГУ-дин дараматда Вирироссиядин олимпиададин III пай кьиле фена. Чи уьлкведин жуьреба-жуьре вузрай ина иштиракай студентрин кьадар 3500-дав агакьнавай. Олимпиадада 16 студент 1-чкайриз лайихлу хьана. Абурун арада Аидани авай.
Малум хьайивал, и олимпиадада кIвенкIвечи чкаяр кьур гадаярни рушар МГУ-диз экзаменар авачиз магистратурадиз кьабулзавай. Гьа икI, цIи Даггоспедуниверситет яру дипломдалди акьалтIарай Аида Агъаханова, олимпиадада 1-чка кьуниз килигна, МГУ-дин къецепатан чIаларин факультетдин магистратурадиз (бюджетдин бинедаллаз) кьабулна, гьакIни адаз 150 агъзур манат премияни гана.
— Къецепатан чIаларал зи гъвечIи чIавалай рикI алайди тир. Зи фикирдалди, савадлу гьар са касдиз къецепатан са чIал хьайитIани чир хьана кIанда. Гьелбетда, жуван хайи чIални. Къецепатан чIал чир хьуни, сир туш, хъсан кIвалах жагъурунал гьалтайла, вилик еке мумкинвилер ачухзава. Къенин юкъуз за чирвилер къачузвай пеше гьахьтинбурун жергедай я. Алай вахтунда МГУ-да за къецепатан кьве чIал дериндай чирзава. Сад — ингилис, кьвед лагьайди (жуваз кIандайди хкядай ихтияр ава) — итальян чIалар, — суьгьбетзава чи таватди.
Малум хьайивал, къведай гатуз рухсатрин вахтунда Аида кьве вацра США-диз стажировкадиз рекье твада. И карди къачунвай чирвилерикай менфят къачудай мумкинвал гуда.
Чи мурад Аидадихъ мадни еке агалкьунар, хушбахтлу уьмуьр хьун я!
Рагнеда Рамалданова
