Акьалтзавай несил чи баркаллу бубайрин кьегьалвилин, игитвилин чешнейралди тербияламишун адетдиз элкъвенвай кар я. Ахьтин игитарни республикада тIимил авач. Абурукайни сад террориствилин гьерекатдин вилик пад кьадай вахтунда телеф хьайи Россиядин хатасузвилин федеральный къуллугъдин капитан Артур Бабаев я.
Лугьун лазим я хьи, гзаф инсанрин уьмуьр хаталувиликай хуьн патал вичин чан къурбанд авур Артур Бабаеван игитвал чешне яз къалуруналди, къе жаванрин несилар тербияламишзава. ФСБ-дин офицерди республикадин ва уьлкведин тарихда вичин тIвар тунва. Россиядин ФСБ-дин Дагъустан Республикада авай Управленидин эксперт-взрывотехник Артур Амирханович Бабаева гъилелди туькIуьрнавай 43 ва хъиткьиндай пара хаталу 38 шей хатасуз авуна. Адан алахъунар ва алакьунар себеб яз, гзаф инсанар телеф хьунал гъидай терактрин вилик пад кьуна. Эхиримжи дуьшуьшда 2009-йисан 2-июлдиз ракьун рекьин “Уйташ” переезддин мукьварив ракьун рекьик кутунвай хъиткьиндай шей хатасуз ийидай вахтунда Артур Бабаев телеф хьана.
Артур Амирханович халис ватанперес, дирибаш, жуьрэтлу кас тир. Ам игит хьун патал яшамиш хьайиди туш, ада анжах вичин къуллугъдин, инсанвилин буржи итимвилелди кьилиз акъудна. Гьавиляй Россиядин хатасузвилин органрин работникрин Йикъан вилик ада кIелай 30-нумрадин школада, политехнический колледжда ватанпересвилин тарсар кьиле тухузва, Бабаеван игитвал рикIел хкизва.
Вичин къуллугъдин везифаяр кьилиз акъуддайла, чанни гьайиф татана, цIудралди инсанар хаталувиликай хвейи капитандин тIвар тарихда эбеди яз кхьенва. Президент В.Путинан Указдалди Артур Бабаеван игитвал “Жуьрэтлувиляй” ордендалди къейдна. Адан тIварунихъ Дербент шегьерда са куьче яда. Идан гьакъиндай талукь къарар кьабулнава.
Руслан Гереев,
Кеферпатан Кавказдин ислам дин
ахтармишунардай центрадин директор
