И йикъара Москва ва Санкт-Петербург шегьерра Дагъустандин лезги районрин векилри Мугьаммад Пайгъамбар хайи вацран гьуьрметдай диндин межлисар кьиле тухвана. И мярекатра Москвадин муфтийдин заместитель Ильнур Гайнутдинова, Сулейман-Стальский райондин имамрин советдин председатель Гьасан Амаханова, Кьурагь райондин имамрин советдин председатель Рамазан Бугъаева, РД-дин Муфтиядин Ахцегь районда авай марифатдин отделдин кьил Хуснудин Ашуралиева, Докъузпара районда авай гьа ихьтин отделдин регьбер Алихан Сефиханова, Хасавюрт райондин Къурушрин хуьруьн имам Азим Панагьова, Ярагъ Мегьамедан тIварунихъ галай фондунин векил Абдурагьман Рагьманова ва масабуру иштиракна.
Межлисрин сергьятра аваз диндин алимри кIватI хьанвайбуруз диндин мярекатрикай авай хийирдикай, Пайгъамбардиз авай кIанивиликай, чирвилер къачунин важиблувиликай, диде-бубадихъ, гъвечIи-чIехидахъ галаз хвена кIанзавай алакъайрикай ва маса месэлайрикай лагьана.
Москвада кьиле фейи мярекатда иштиракчийрин арада диндиз талукь суалрикай ибарат викторина кьиле тухвана. Дуьз жавабар гайибурув, савкьатар яз, Ярагъ Мегьамедан уьмуьрдин ва яратмишунрин рекьикай кхьенвай ктабар вахкана.
Къейд ийин хьи, Ислам Гьамидова тамамарай нашидар межлисра иштиракайбуру хушдиз кьабулна.
Къуй лезги халкьдин векилри Урусатдин кьилин шегьерра кьиле тухвай и берекатлу мярекатар Аллагьди кьабулрай!
Агьмед Магьмудов
