Дербент шегьердин аялринни жаванрин яратмишунрин Дворецда (ДДЮТ) кардик квай хореографиядин ансамбль — Дагъустандин вири халкьарин кьуьлер чIехи устадвилелди тамамарзавай жаванрин коллектив — махсус концертар гуналди неинки Дербентда, гьакI адалай къецени машгьур я. Кьуьлерал рикI алайбур вичин устадвилелди шадарзава, тамашачийрин патай гьар сеферда гурлу капариз, гьакI жуьреба-жуьре дережайрин дипломриз, гьуьрметдин грамотайриз ва маса шабагьриз лайихлу жезва.
“Къецепатан уьлквейрани кьиле физвай международный фестивалра ва килигунра иштиракуналди хайи шегьердин ва вири республикадин тIвар ва машгьурвал хкажзава.
ИкI, алай йисан гатун эхирра “Гюнеш” ансамблди Чехияда кьиле фейи фольклордин международный фестивалда иштиракна, Гран-При къазанмишна. Са гьафтедин вахтунда Словакиядай, Хорватиядай, Польшадай, Гуржистандай, Тайвандай, Коста-Рикадай, Чехиядай ва гьакI дуьньядин са жерге маса уьлквейрайни атанвай жаванрин хореографиядин ансамблри иштиракай и фестивалдин программадик кваз Дербентдай тир кьуьлерин коллективди Чехиядин са шумуд шегьердани концертар гана.
И мукьвара ансамблдин яратмишунрин уьмуьрда шад ва лишанлу вакъиа хьана — шегьердин кьил Хизри Абакарова ансамблдин художественный руководитель Интигам Аскеровав, ДДЮТ-дин директор Заидат Мазановадив ва шегьердин администрациядин жегьилрин политикадин отделдин начальник Хочбар Баркаевав, Дербентдин культурадин уьмуьрда агалкьунралди иштиракуниз ва “Гюнеш” ансамблдин машгьурвилиз килигна, “Дербент шегьердин вилик лайихлувилерай” знакар вахкана.
— Культурадин ва искусстводин хиле куь алакьунри Дербентдин вири жемят шадарзава. Зи мурад куьн генани чIехи шабагьриз лайихлу хьун я, — лагьана Хизри Абакарова шабагьар вахкудайла.
Нариман Къарибов
