Зулун и йикъара дербентвияр, къадим шегьердин мугьманар ва иниз йисалай-суз гзаф къвезвай туристар патал вижевай савкьат арадал гъанва. Амни “Эпоха” издательствода чапдай акъатнавай винидихъ тIвар кьунвай ктаб я. Ам урус чIалалди кхьенва. Автор, Дербент шегьердин ЦБС-дин (Центральный библиотечный система) директор Диана Алиевади лугьузвайвал, ктабдин винел ада гзаф йисара кIвалахна. Къадим шегьердин куьчейрикай, вини магьалрикай тарихдин алава делилар кIватIна (са бязи куьчейрин, слободайрин, майданрин, переулокрин…), тIварар мус ва гьикI дегиш хьанатIа, архивдин документрай чирна.
Авторди шегьердин куьчейриз сифте яз 1897-йисуз чкадин векилрин Собраниди тIварар гайиди рикIел хкизва. Дербентдин лап куьгьне паюна авай вири 9 магьалдин тарихдин справка ганва.
Ктабдин метлеблувал, къиметлувал генани адакай ибарат я хьи, ана сифте яз ХIХ-ХХI асирра (идалай вилик Дербентдикай кхьена акъатнавай ктабра авачир) шегьердин куьчейрикай дегишвилерин барадайни итижлу малуматар гьатнава. КIелдайдаз регьят жедайвал, авторди Дербентдин вири куьчейрин тIварар алфавитдин къайдада ганва.
«Лезги газет»
