2-ноябрдиз КцIар шегьердин кьилин ктабханадин чIехи залда литературадин «Шагьдагъ» ва «Марвар» кIватIалри Дагъустандин халкьдин шаир Байрам Салимован 90 йисан юбилейдиз талукьарна арадал гъайи мярекат кьиле фена. Ам зари Вакъиф Муьшкуьрвиди шаирдин уьмуьрдин рекьикайни эсеррикай авур докладдилай гатIунна.

Мярекатдиз Махачкъаладай атанвай Б.Салимован уьмуьрдин юлдаш Набисатани руш Эсмера, Бакудай, Къубадай, Яламадай, Худатай атанвай вахарин ва стхайрин аялрини хтулри чимивални миливал гъана.

Мярекатдал зарияр тир Лезги Багьлула, Билал Адилова, Адил Къайибханова, Гуьлалийрин Эйваза, шаирдин эсеррал рикI алай Багьрам Залова, Абир Тагьирова, Шихжамал Шихметова, Оруж Оружева, Жавид Тагьирова, Роберт Къайитмазова, лезгийрин милли медениятдин «Самур» Меркездин правленидин член, физикадин илимрай философиядин доктор Дуьнямеддин Аскерова ва гьакIни лезги чIалан ктабрин эксперт, педагогикадин илимрай философиядин доктор Гьесанбала Мамедова юбилярдикай ихталатарна, чпин рикIин гафар лагьана.

Чубукьлу хуьруьн мектебдин директор, юбилярдин хуьруьнви Къунагъ муаллим мектебда кIелзавай аяларни галаз атанвай. Къардашова Феридади шаирдин «Дири къванер», Къардашов Къиямеддина ва Алимирзева Зегьради «Зи чил» ва «Зи хуьр» шиирар хуралай кIелна.

Байрам Салимован юбилейдиз талукьарнавай суварик КцIарин Лезги драмтеатрдин актерар тир Замир Бабаев заридин «Зи хайи кIвал», Иса Мусаев «Кьисмет», Рантик Успатов «Ая на инсаф» шиирар гваз атанвай.

Пуд сятина кьиле фейи мярекат оператор СтIурви Адила лентиниз къачуна.

Шикилар — ТIигьиржалви Камрананбур.

Камран Къурбаналийрин