Чи ватанэгьлияр — гьар сана

Кьисметди жуьреба-жуьре чкайриз, гъурбатриз акъуднавай лезгийрикай сад алай вахтунда Къазахстандин Алма-Ата шегьерда яшамиш жезвай  Гъабил  Имамеддинович  Халафов  я.

Ам 1959-йисан 20-мартдиз Азербайжандин КцIар шегьерда дидедиз хьана. Адан буба Имамеддин Халафов 44 йисуз тамарин майишатда техниквиле кIвалахай, районда вирибуруз сейли инсан тир. Гъабилан диде Гуьлуфа Халафова туьквендин заведующий яз  хьана.

Гьеле 4-классда кIелзавай жаван яз, Гъабил зегьмет чIугунив эгечIна. Хизан чIехиди (абур вад велед авай), диде-бубадин мажибарни гъвечIибур хьуниз килигна, мектебда тIатIилар гайи вахтунда Гъа­билани адан чIехи стхади консервиярдай заводда кIвалахар ийиз хьана. ЧIехи классриз акъатайлани, жуьреба-жуьре чкайра зегьмет чIугваз, ада вичиз пек-партал къачудай такьатар къазан­миш­дай. Аял чIавалай четинвилериз дурум гайи жегьилдиз зегьметдин къадир ва дарвилихъ генгвални галайди чир хьана.

Мектебда кIелдай йисара ам “Зарница”, “Орленок” командайрин капитан тир. Ада райондин, республикадин дережадин жуьреба-жуьре акъажунра, физикадайни математикадай кьиле фейи олимпиадайра агалкьунралди иштиракзавай.

Мектеб куьтягьай жегьилдин вилик гележегдин пеше хкягъунин месэла акъвазна. Военный хьунин­ гьевес авайдакай хабар хьайи дидедини ви­чин веледди игитвилин — Ватан хуьнин — пеше хкя­гъунал разивал къалурна. Имтигьанар агалкьун­ралди ­вахкуналди, рикIе экуь къастар авай жегьил 1977-йисуз Азербайжан ССР-дин Верховный Советдин тIварунихъ галай Бакудин ВОКУ-дик (Высшее общевойсковое командное училище) экечIна. Са тIи­мил вахтунилай ина адан шикил, лап хъсан кIелза­вай­бурун жергедик кваз, махсус стенддал хьана. Гележегдин полковникди училищедин уьмуьрда активнидаказ иштиракзавай, ам волейболдин ва гранат яргъаз гадарунин командайрик квай. Кьвед лагьай курсунилай ам отделенидин командир, сержант хьана.

1981-йисуз училище агалкьунралди куьтягьай адаз батальондин командирди ана амукьун теклифна, амма Гъабил рази хьанач. Къуллугъ кьилиз акъудун патал ам САВО-диз (Среднеазиат­ский военный округ) ракъурна. Гуьгъуьнлай ада Афгъанистандин женгерани иштиракна.

1987-йисуз ам Къазахстандин Панфилов (гила Жаркент) шегьердиз рекье туна. 1997-2000-йисара Гъабил Имамеддиновича Къазахстандин яракьлу къуватрин военный академияда кIелна. Гуьгъуьнлай ам ана тактикадин ва оперативный искусстводин кафедрадин начальникдин къуллугъдал тайинарна. 2004-йисалай ада кIелунрин ва илимдин кIвалахрин рекьяй военный академиядин начальникдин заместителвиле кIвалахна. Алакьунар, тежриба авай пешекар тирвиляй 2013-йисуз ам штабдин начальниквиле тайинарна.

Полковникдин чинда авай Гъабил Халафов 2014-йисалай запасда авай офицер я.

К.Ферзалиев